Xitoycha saxiylik, «baxillashgan» grandlar. Qishning eng shov-shuvli transferlari haqida

Toshkent vaqti bilan 1 fevral tongiga yaqin Evropaning etakchi chempionatlarida qishki transfer oynasi yopildi. Tribuna.Uz transfer bozori yakunlari, bozorining shov-shuvlari, eng asosiy o'nta transfer haqida ma'lumot berishga qaror qildi.

Xuddi 2016 yilning qishki transferlar vaqtida bo'lgani kabi bu safar ham Xitoy asosiy rolni o'ynadi. Hali chin yurtida transferlar oynasi yakunlanganiga qaramay, hozirning o'zida mamlakat qishki transfer bozoradiga eng shov-shuvli transferlar bo'yicha etakchilik qildi.

Qishki transfer oynasidagi eng qimmat 10ta transferning to'rttasi aynan shu chempionat vakillari ishtirokida (jami 121,7 mln. evro sarflandi) amalga oshirildi. Evroaning etakchi chempionatlari Angliya, Germaniya, Ispaniya va Italiya jamoalar bu paytda nisbatan olib qaraganda, yirik xaridlarni amalga oshirishmadi. Faqatgina Frantsiya birinchiligi vakillari bu safar faolroq bo'lganini qayd etish lozim. O'nta eng qimmat transferning uchtasi aynan shu chempionatda amalga oshirildi. Buning uchun jamoalar 99,3 mln. ero sarf etishdi.

Shuningdek, bu yilgi qishki transferlar vaqtidagi eng qimmat xarid amalga oshirildi. (Oskar uchun 60 mln evro. Bungacha rekord 2011 yilda Fernando Torresning 58,5 mln. evro evaziga «Liverpul»dan «Chelsi»ga o'tishida o'rnatilgandi) Shuningdek bu transferlar futbolchi uchun to'lanadigan eng qimmat maosh bo'yicha ham (37,5 mln evro —Karlos Tevesning «Shanghay Shengxua»dagi yillik daromadi) rekord o'rnatildi.

Qishki transferlar rekordchisi
Oskar (60 mln. evro. «Chelsi»dan «Shanghay SIPG»ga. Shartnoma muddati: 4 yil)
Bir necha yil oldin braziliyalik yarimhimoyachi o'z yosh toifasidagi eng iqtidorli futbolchilardan biri sanalardi. «Chelsi»ga Antonio Konte bosh murabbiy bo'lib kelgach, Oskar asosiy tarkibdagi o'rnini yo'qotib qo'ydi. 2016/17 yilgi mavsumda futbolchi jami bo'lib, londonliklar safida 11 uchrashuvda (9ta Angliya chempionati, shunlardan 5tasida asosiy tarkibda; ikki marta liga Kubogi, shularning bittasi asosiy tarkibda) maydonga tushdi. Bu davr mobaynida u faqatgina bir marta golli uzatmani amalga oshira oldi, xolos.

Oskar endilikda Xitoyda Evro-2016 chempioni Rikardu Karvalo, «Krasnodar»ning sobiq futbolchisi, O'zbekiston terma jamoasi sardori Odil Ahmedov, shuningdek vatandoshi, sobiq «Zenit» futbolchisi Xalk bilan birga to'p suradi. «Shanhay SIPG»da hozirgi kunda «Chelsi», «Tottenhem» va «Zenit» jamoalari sobiq ustozi Andre Villash-Boash bosh murabbiy sanaladi.

Oskarni sotishda «Chelsi» 28 mln. evro ishlab oldi (2012 yilda ingliz klubi uni sotib olish uchun 32 mln. evro sarflagandi).

Evropa klublari o'rtasidagi eng qimmatbaho savdo
Yulian Draksler (40 mln. evro. «Volfsburg»dan «PSJ»ga, Shartnoma muddati: 4,5 yil)
Draksler bir necha yillardan buyon Germaniyaning eng iqtidorli futbolchilaridan bir sifatida e'tirof etiladi. O'z mamlakatida «Shalke» va «Volfsburg» tarkibida to'p surgan, ammo aytarli sovrinlarni (2010/11 yilgi mavsumda Germaniya Kubogi va Superkubogidagi g'alaba) qo'lga kiritmagan. Yarimhimoyachi EChLda muntazam ishtirok etadigan «PSJ» safiga 9 mln. evro yillik maosh evaziga o'tib ketdi. 2014 yilda Germaniya bilan jahon chempioni unvonini qo'lga kiritgan futbolchi,  yangi jamoasi safida to'rtta uchrashuv o'tkazib, ikkita gol kiritishga ham ulgurdi.

Drakslerni sotishdan «Volfsburg» 3 mln. evro zarar ko'rdi. (2015 yilda Yulian bilan shartnoma nemis klubiga 43 mln. evroga tushgandi).

Qishda tovlangan yagona janubiy amerikalik
Gabriel Jezus (32 million evro, «Palmeyras»dan «Manchester Siti»ga. Shartnoma muddati: 4,5 yil)
19 yoshli Olimpiada chempioni 2016 yilning yozidayoq manchesterliklar bilan shartnoma imzolagandi. Biroq futbolchining istagi sabab, u Braziliyada mavsumni yakunlab qo'ydi: uzoq yillik tanaffusdan keyin «Palmeyras»ga mamlakat chempioni unvonini qaytarib olishda yordamlashdi va yanvarning o'rtasiga kelibgina «Siti»ga tashrif buyurdi. Braziliyadagi ikki yillik professional faoliyati davomida u 83 uchrashuvda maydonga tushib, 28ta gol urishga muvaffq bo'ldi.

21 yanvar kuni Jezus «Manchester Siti» tarkibida «Tottenhem»ga qarshi uchrashuvda 82-daqiqada maydonda tushib, faol harakat qildi. Qisqa vaqtda u darvozaga uch marta zarba berishga ulgurdi, hattoki gol kiritishga ham muvaffaq bo'lgandi, biroq ofsayd qayd qilingani sabab gol inobatga olinmadi.
«Palmeyras» o'z tarbiyalanuvchisini sotish orqali 32 mln. evro ishlab topdi.

Portugaliya chempionatining 2017 yildagi eng qimmat futbolchisi 
Gonsalo Guedesh (30 mln. evro. «Benfika»dan «PSJ»ga. Shartnoma muddati: 4,5 yil)
20 yoshli «Benfika» tarbiyalanuvchisi 2016/17 yilgi mavsumdan boshlab ilk marta faqat lissabonliklar  asosiy jamoasida (oldingi ikki mavsumda ikkala jamoa o'rtasida «sarson» bo'lgan) to'p sura boshlagandi. Guedesh «Burgutlar» safida 68 uchrashuvda maydonga tushib, 11 marotaba gol urgan. Bu vaqt davomida «Benfika» ikki martadan mamlakat chempionati va superkubogida zafar quchdi. Shuningdek ikki marta liga kubogida ham g'alaba qozondi.

29 yanvar kuni kuni futbolchi «PSJ» safida «Monako»ga qarshi chempionat uchrashuvining (1:1) so'nggi uch daqiqasida maydonga tushirildi.
«Benfika» o'z tarbiyalanuvchisini sotish evaziga 30 mln. evro foyda ko'rdi.

«Aylana, aylana qozig'ini topgan ot»
Dimitri Payet (29,5 mln evro. «Vest Hem»dan «Marsel»ga. Shartnoma muddati: 4,5 yil)
2016 yilgi Evropa chempionatining eng yaxshi futbolchilaridan biri 2013-2015 yillarda to'p surgan jamoasiga yana qaytdi. Payet uchun Angliyada barchasi yaxshi kechayotgandi. Biroq oilaviy muammolar sabab u jamoadan ketishni istab qoldi va butun oy davomida dunyo matbuotiga mavzu bo'lgan janjallarni yuzaga keltirdi. Oxir-oqibat londonliklar 1,5 yarim mavsum davomida jamoa uchun 60 uchrashuvda maydonga tushiyu, 15ta gol urgan futbolchini sotib yuborishga qaror qildi.

«Vest Hem» futbolchini sotishdan 14,5 mln evro foyda qildi (2015 yilda Payet uchun londonliklar 15 mln. evro to'lashgandi).

Uch baravar qimmatlagan «qora javohir»
Odion Igalo (23,3 mln. evro, «Uotford»dan «Chanchung Yatay»ga)
Igaloning Xitoyga o'tgan transfer narxi uning bu paytgacha sotilgan barcha transfer narxlarini qo'shib hisoblaganda ham 2,6 baravar ko'proq summani tashkil qiladi. Xitoy klubiga o'tguniga qadar nigeriyalik hujumchi Angliya chempionatida 2,5 yil to'p surdi. Bu davrda 100ta uchrashuvda 39ta gol kiritishga muvaffaq bo'ldi.

Igaloni sotishdan «Uotford» taxminan 21,3 mln evro ishlab topdi(2014 yilda jamoa uni «Udineze»dan sotib olganida shartnomada futbolchi transfer qilinsa, bir qismi italiyaliklarga ham o'tkazib berilishi kerak bo'lgan. Biroq bu borada aniq summa ma'lum emas).

Angliya ichidagi qishning eng qimmat transferi
Morgan Shneyderlin (22,9 mln. evro, «MYu»dan «Everton»ga. Shartnoma muddati: 4,5 yil)
Manchesterga kelganida sal bo'lmasa, Angliyaning eng yaxshi tayanch yarimhimoyachisiga tenglashtirilgan Morgan jamoada aytarli hech qanday karomat ko'rsata olgani yo'q. Mourino kelgach, umuman tarkibdagi o'rnini yo'qotib qo'ydi. Ikki mavsum «MYu»da o'ynagan futbolchi barcha musobaqalarni qo'shganda 42ta uchrashuv o'tkazib bitta gol urdi. Joriy mavsumda esa atigi 3ta uchrashuvda maydonga tushgandi.

«Everton» safida futbolchi ikkita o'yin o'tkazishga ulgurdi. Ikki safar ham u zaxiradan maydonga tushirilgandi.
Frantsuz futbolchisini sotishdan «MYu» bir yarim yil ichida 12,1 mln. evro yo'qotdi (2015 yilda manchesterliklar Morgan uchun «Sauthempton»ga 35 mln. evro to'lagandi).

Xitoylik eng qimmat futbolchi
Chjang Chjeng Dun (20,4 mln. evro, «Beyjing Guan»dan «Xebey Chayna Forchun»ga. Shartnoma muddati: 5 yil)

Poytaxt va Xebey provintsiyasi jamoalari o'rtasida amalga oshgan transfer mazkur transfer oynasining eng ajabtovur savdolaridan biri bo'ldi. So'nggi marta 2014 yilning mayida gol urgan yarimhimoyachi uchun «Xebey» 20 mln.dan oshiqroq mablag' to'ladi. Transfermarkt.de ma'lumotlariga ko'ra, uning transfer narxi yangi klubga o'tishi arafasida 475 ming evroni tashkil qilgan. Uning eng bozordagi eng maksimal narxi 1,4 mln evrogacha (2012 yilda) ko'tarilgan.
«Beyjing Guan» Chjeng Dun transferidan 18,9 mln. evro ishlab oldi (2013 yilda poytaxtliklar unga 1,5 mln. evro to'lashgan).

Yangi Pelle umidida
Manolo Gabbyaddini (20 mln. evro. «Napoli»dan «Sauthempton»ga. Shartnoma muddati: 4,5 yil)
Mavsum avvalida Higuainni sotib yuborgan «Napoli» uning o'rniga sotib olingan Arkadiush Milik uzoq muddat safdan chiqqach, aynan Manologa ishonch bildirishi kutilgandi. Biroq Sarri kutilmagan Dris Mertensdan yangi markaziy hujumchi ixtiro qila oldi. Gabbyaddinidan esa ketishdan boshqa variant qolmagandi.

Italiya ichidagi qishning eng qimmat transferi
Leonardo Pavoletti (18 mln. «Jenoa»dan «Napoli»ga. Shartnoma muddati: 4,5 yil)
Neapolliklar Gabbyaddini ketishidan oldinroq Pavoletti bilan kelishib bo'lishgandi. Asosiy tarkibdan o'rin kafolatlanmagan futbolchi uchun «Napoli» yaxshigina pul to'ladi. Leoning «Jenoa»dagi ikki mavsumi unchalik yomon o'tmadi.  Forvard 46 uchrashuvda 25ta gol urdi.
Genuyaliklar futbolchini sotishdan 15 mln evro ishlab topishdi(2015 yilda futbolchi uni 3 mln. evroga sotib olgandi).

Ispan klubi ishtirokida eng qimmat transfer
Aleshandre Pato (18 mln. evro, «Vilyarreal»dan «Tiangjing Tszyuangtszyang»ga. Shartnoma muddati: 3,5 yil)
Pato 10 yil muqaddam zamonaviy futbolda Braziliyaning eng iqtidorli futbolchilaridan biri sifatida qaralardi. Ammo futbolchi o'z imkoniyatlarini to'liq ro'yobga chiqara olmadi. 2013 yildan 2016 yilga qadar Braziliyaning «Korintians» klubiga tegishli bo'lgan futbolchi turli klublarda ijaraga asosida yurdi, lekin birortasida o'zini aytarli tarafdan ko'rsata olmadi.

Yozda u «Vilyarreal» safiga kelib qo'shildi. Yarim mavsumda 22 uchrashuv o'tkazgan futbolchi 6 bor raqiblar darvozasini ishg'ol qilishga muvaffaq bo'ldi.

Ispan jamoasi Patoni sotishdan 4 oy ichida 15 mln evro foyda ko'rdi (2016 yil yozida  hujumchi 3 mln. evro evaziga sotib olingandi).

Teglar: xitoycha, saxiylik, «baxillashgan», grandlar, qishning, shov-shuvli, transferlari, haqida,
← OldingaOrqaga →