APL. «Manchester Siti» mehmonda «Vest Hem»ni tor-mor keltirdi

Angliya premer-ligasining 23-turidan o'rin olgan yana bir uchrashuvda «Vest Hem» «Manchester Siti»ni qabul qildi.

Bir oy muqaddam Angliya kubogida jamoalar Londonda uchrashishgan va unda Gvardiola shogirdlari 5:0 hisobida g'alaba qozongandi. Bu safar ham «Siti» mehmonda o'ynashiga qaramay raqibni yirik hisobda taslim etdi.

Avvaliga Kevin de Bryuyne «Siti» debyutanti Gabriel Jezusning to'p uzatishidan so'ng hisobni ochdi. 21-daqiqada Leroy Sanening ajoyib yurishidan so'ng etkazib berilgan to'pni David Silva darvoza to'riga joylab qo'ydi. Birinchi golga assistenlik qilgan Gabriel Jezus asosiy tarkibdagi debyutida gol urishga ham muvaffaq bo'ldi. Rahim Sterling tomonidan etkazib berilgan to'pni braziliyalik 19 yoshli futbolchi qiyinchiliksiz Rendolf darvozasiga yo'lladi.

Ikkinchi bo'limda Rahim Sterlingga ishlatilgan qo'pollikdan keyin belgilangan penaltini Yahyo Ture aniq amalga oshirib o'yindagi yakuniy hisobni o'rnatdi. 4:0 — «Manchester Siti»ning navbatdagi yirik hisobdagi g'alabasi.

Ushbu g'alabadan keyin «Manchester Siti» hisobidagi ochkolar soni 46taga etdi va jamoa «Liverpul» bilan bir xil ochko to'plagan holda 4-5 o'rinlarni bo'lishib turibdi. «Vest Hem» hisobida esa 28 ochko bor va jamoa 11-pog'onada bormoqda.

Angliya premer-ligasi, 23-tur

Vest Hem – Manchester Siti 0:4 (0:3)
Gollar: de Bryuyne (17), Silva (21), Gabriel Jezus (39), Ture (67, penalti).
Vest Hem: Rendolf, Rid, Kressuell, Bayrem, Fonte, Obiang (Snodgrass, 64), Nobl, Lansini, Antonio, Feguli (Fernandesh, 64), Kerroll (Fletcher, 79).
Manchester Siti: Kabalero, Otamendi, Kolarov, Sanya, Stounz, Ture, Silva (Delf, 80), de Bryuyne (Fernandino, 67), Sterling (Aguero, 73), Sane, Gabriel Jezus.
Ogohlantirishlar: Obiang (19), Gabriel Jezus (19), Lansini (24), de Bryuyne (44), Sterling (60), Kerroll (71).

Teglar: «manchester, siti», mehmonda, «vest, hem»ni, tor-mor, keltirdi,
← OldingaOrqaga →