Futbolning 59 yillik qayg'uli sahifasi. «MYu»ning samo sochilgan oltin avlodi
/ Kiritdi: BestMaster O'qilgan: 1479
Bundan roppa rosa 59 yil muqaddam, 1958 yil, 6 fevral kuni Angliyaning «Manchester Yunayted» klubi futbolchilari o'tirgan samolyot Myunxenda halokatga uchragandi. Tribuna.Uz «Mett Basbi bolalari» nomi bilan mashhur jamoaning fojiasini qisqacha eslab o'tadi.
1958 yilning fevrali nafaqat futbol, balki butun sport olamidagi eng katta yo'qotishlardan biri sifatida tilga olinadi. Garchi 9 yil oldingi Torinoda bo'lgan fojiadan ko'ra yo'qotishlar kamroq bo'lganiga qaramay, bu voqea shov-shuvi ancha baland bo'lgandi.
British European Airways kompaniyasi bortida «Manchester Yunayted» futbolchilarini olib ketayotgan samolyoti sobiq Yugoslaviya poytaxti Belgraddan qaytayotganida yoqilg'i to'ldirib olish maqsadida Germaniyada, Myunxenda to'xtab o'tadi. Ammo bu laynerning so'nggi bor muvaffaqiyatli qo'nishi edi. Samolyot birinchi bor ko'tarilishga uringanida chap dvigatelda chiqqan nosozlik parvozga xalaqit beradi. Ikkinchi urinish ham muvaffaqiyatsiz chiqadi. Uchinchi urinishda kuchli qor yog'ishi natijasida tezligini yo'qotgan laynerning chap qanoti aeroport yaqinidagi uylarning biriga uriladi.
Bortda bo'lgan 45 nafar yo'lovchidan 24 kishi tirik qoladi. Omon qolganlar orasida jamoa bosh murabbiyi Mett Basbi va o'sha paytlarda hali juda yosh bo'lgan, 1966 yilgi «Oltin to'p» sohibi Bobbi Charlton ham bor edi.
«Basbi bolalari» nomi bilan tanilgan (klubning o'rtacha yoshi 22 yoshni tashkil qilgan) klub 1957 yilda Angliyada chempion bo'ladi. Belgradda jamoa Chempionlar Kubogi yarim finalini o'ziga naqd qilib ortga qaytgandi. Ammo mazkur voqea jamoaga bu sovrinni qo'lga kiritishga yo'l qo'ymadi.
O'shanda omon qolganlar dafn marosimi vaqtida marhumlar boshida tik turib, bitta gapni bot-bot takrorlashgandi: «bu lan'ati kubokni albatta yutamiz. Siz uchun yutamiz!». Albatta bu va'dani bajarish uzoq muddat talab qildi. 1968 yilda «MYu» chempionlar kubogi finalida «Benfika»ni 4:1 hisobida engib bosh sovrinni qo'lga kiritdi. O'yinda ikkita golni Bobbi Charlton kiritgandi. Jamoa bosh murabbiyi esa o'sha afsonaviy Mett Basbi edi.
Bosh sahifaga
216