«O'yinni sharhlang, janob sharhlovchi!» Sport telekanaliga muxlis maktubi

Kecha Osiyo chempionlar ligasining saralash uchrashuvi doirasida O'zbekistonning ikki jamoasi maydonga tushdi. Ikkala uchrashuv ham O'ZMTRK tarkibidagi telekanallar Sport va UzHD orqali to'g'ridan-to'g'ri translyatsiya qilindi. Ammo ushbu translyatsiyalar vaqtida o'yinlarni sharhlab borgan sharhlovchilarga qattiq e'tirozlar yangradi. Ijtimoiy tarmoqlarda bu ikki o'yin sharhi eng ko'p muhokama qilindi. Shunday e'tirozlardan biri Kun.Uz tahririyatiga kelib tushdi. Quyida ushbu e'tiroz ma'nosida yozilgan xatni o'quvchilarimizga taqdim etamiz.

Assalomu alaykum, hurmatli Kun.Uz va Tribuna.Uz sayti ijodkorlari! Ochig'ini aytsam, kimga murojaat qilishni bilmadim, dardimni kim eshitarkin degan umidda axiyri sizlarga yozishga qaror qildim. Zor aytmoqchi bo'lganlarim sizga ma'qul kelib, bu xat saytda e'lon qilinar. Shu orqali Sport kanali mutasaddilariga gaplarimiz etib borar...

Bugun (xat 7 fevral kuni kechki payt Kun.Uz tahririyati e-pochtasiga kelib tushgan) Sport telekanali orqali OChL saralash bosqichining «Nasaf» ishtirokidagi o'yini namoyish qilindi. Xursand bo'lib o'yinni ko'ramiz deganimizda, xafsalamiz pir bo'ldi. Faqat jamoamiz qayd etgan natijadan emas, o'yinni sharhlagan sharhlovchining o'zi kayfiyatimizni rasvo qilish uchun etarli bo'ldi.

Uchrashuvni sharhlash uchun «Nasaf» darvozaboni Eldor Suyunov ham chaqirilibdi. Albatta bu yaxshi. Chunki futbolni ichidan bilgan, uning ishtirokchisi bo'lgan odam bilan sharhni qiziqarliroq qilish mumkin. Biroq shu kuni o'yinni sharhlagan (ochig'i kimligini ham bilmayman. Sport kanalida «voh» deb eslab qoladigan tayinli sharhlovchi ham qolmagan, afsuski) sharhlovchimi, suxandonmi, farqlashni iloji bo'lmadi, kimsa shu qadar ko'ngilni xira qildiki, televizorni ovozini o'chirib, radioni yoqib qo'ygan holda o'yinni eshitishga to'g'ri keldi. Menimcha shu kuni sharhlovchi ko'pchilikning qon bosimini oshirib yuborgan bo'lsa kerak...

Uning o'yinni sharhlash paytidagi xatolarini aytmay qo'ya qolay. Uni birgina Eldor Suyunovni sharhga qo'shmoqchi bo'lgan vaziyatlarini o'zini eslasam... «Nasaf» hujum qilyapti. Sharhlovchi esa Suyunova savol beryapti. «Nasaf» xavfli vaziyat yaratyapti, u bo'lsa «Eldor, «Nasaf» mavsumga qanday tayyorgarlik ko'rdi», deb savol beryapti? Ey baraka topgur, agar darvozabonni intervyu olishga chaqirgan bo'lsang, o'yindan keyin qilsa ham bo'ladiku buni? Nahot «Nasaf»ning o'zi kam sonli hujum bo'lsayu, o'shani ham aytmay, vaziyatga aloqasi yo'q bo'lgan mavzuda gapirib o'tirsa?

Biz XXI asrda, texnologiyalar rivojlangan asrda yashamoqdamiz, o'yindan oldingi ma'lumotlar, prevyularni internet orqali o'qib olamiz. Menimcha 90 foiz odam xuddi shunday qiladi. Bunaqa auditoriyaga hujum bo'layotganda, maydonda kurash kechayotganda, darvozabondan qanday tayyorgarlik ko'rganini eshitimiz shart emas, menimcha.

Yozmay desam bo'lmadi. Bir paytlari Axbor Imomxo'jaevdek sharhlovchilarni etishtirib bergan o'zbek sharhlovchilik maktabida nahotki birorta munosib shogird etishib chiqmay qolgan bo'lsa?..

Shuhrat, Farg'ona viloyati

Teglar: «oyinni, sharhlang, janob, sharhlovchi!», sport, telekanaliga, muxlis, maktubi,
← OldingaOrqaga →