Edgar Gess yana O'zbekistonda ishlaydigan bo'ldi
/ Kiritdi: BestMaster O'qilgan: 1149
Yangi mavsumga tayyorgarlik olib borayotgan «Dinamo» klubi murabbiylar shtabida o'zgarish yuz berdi. Bu haqda klub matbuot xizmati xabar tarqatdi.
Manba bergan xabarga ko'ra, samarqandliklarga bosh murabbiy etib tajribali mutaxassis Edgar Gess tayinlandi. Gess bilan imzolangan shartnoma shartlari bo'yicha aniq ma'lumotlar berilmagan. Yangi bosh murabbiyga Uchqun Qobilov va Rafael Balasanyanlar yordam beradi.
O'tgan yili sog'lig'idagi muammolarga qaramay, «Dinamo» jamoasini Oliy Ligaga qaytargan jamoa bosh menejeri Ilhom Sharipovning shartnomasi nihoyasiga etgan. Shuningdek u salomatligini tiklashi kerakligini ma'lum qilgan. Shunga qaramay, Ilhom Sharipov sog'lig'ini tiklash bilan birga klub rahbariyatidagi faoliyatini davom ettiradi.
Shuningdek, bir necha yildan buyon «Dinamo» klubi qoshidagi futbol maktabi direktori hamda jamoa boshlig'i sifatida faoliyat yuritib kelgan Alisher Latipov futbol maktabini yanada rivojlantirish uchun 20 fevral kunidan futbol maktabiga to'liq ishga o'tkaziladi. «Dinamo» PFK rahbari etib Shuhrat Hotamov tayinlandi.
Tez orada 63 yoshni qarshi oladigan Edgar Gess uzoq yillar davomida O'zbekiston jamoalarida faoliyat olib borgan. Murabbiylikdagi ishini «Paxtakor»da boshlagan (1986 yil) mutaxassis, keyinchalik Navoiyning «Zarafshon» (1987-1988 yillar) jamoasida ishlagan. 2006 yilga qadar Germaniya, Turkiya, Rossiya va Qozog'iston klublarida ishlab qaytgan. Shundan so'ng, Gess «Andijon» (2006-2007, 2014-2015) «Nasaf» (2008), «Sho'rtan» (2009-2011/2012-2013) va «Buxoro» (2013-2014) jaomalarida faoliyat olib borgandi.
Bosh sahifaga
1263