Ispaniyadagi dahshatlar, «Chelsi»ning ochko yo'qotishi, sermahsul Italiya va uik-endning eng yorqin lahzalari

O'tgan hafta yakuni voqealarga boy bo'ldi. Angliyada chempionlikni deyarli hal qilib qo'ygani aytilayotgan «Chelsi» bu turda ochko yo'qotdi, Yurgen Klopp jamoasi nihoyat muvaffaqiyatsiz seriyasiga barham berdi. Germaniyada esa «Bavariya» asta-sekin boshqalardan o'zib ketishni boshladi. Tribuna.Uz shu va boshqa uik-endning eng yorqin lahzalarini eslab o'tadi.

«Chelsi» chempion? Yo'q!
Angliya futboli shunaqaki, sen asosiy raqibingdan 15 ochko o'tib ketgan bo'lsang ham, ishonch bilan gapira olmaysan. «Chelsi» qanchalik barqaror futbol namoyish etmasin, raqiblaridan 9 ochko ilgarilab ketgan bo'lmasin, ularni chempion deyishga shoshmaslik kerak. O'tgan haftada bu yana bir bor isbotini topdi. «Byornli»ga qarshi uchrashuvda jamoa ochko yo'qotdi va yanada ilgarilab ketish imkoniyatini boy berdi. Agar bugun tunda «Manchester Siti» «Bornmut» uyida g'alaba bilan qaytsa, oradagi farq 8 ochkogacha qisqarishi mumkin bo'ladi. So'nggi uch turda ikki marta ochko yo'qotgan «Chelsi» qolgan 13 uchrashuvning 4-5tasida ochko yo'qotmasligiga kim kafolat bera oladi?

APLning haftaning markaziy uchrashuvida «Liverpul» «Tottenhem»ni qabul qilib nihoyat g'alaba qozondi. Manening dubli jamoaning 2017 yilda premer-ligada qo'lga kiritgan ilk g'alabasiga sababchi bo'ldi. «Manchester Yunayted» esa «Uotford» ustun kelib, premer-ligada o'ziga xos natija qayd etdi. Lekin jamoa hamon 6-o'rinda qolmoqda. «Arsenal» esa Sanchesning qo'li yordamida bo'lsada, uch ochkoni qo'lga kiritdi. O'yindan keyin futbolchining o'zi ham aybini yashirib o'tirmadi.

Amaldagi chempion «Lester»da esa vaziyat juda yomon. Jamoa 2017 yilda birorta gol kiritishni ham uddalay olgani yo'q. Bu turda ham jamoa mag'lubiyatga uchradi va xavfli hududga tushib qoldi. 

Dahshatga boy Ispaniya
Ispaniyada tur o'yinlari natija e'tiboridan ko'ra, ko'proq maydondagi ko'ngilsizliklar bilan yodda qoldi. «Alaves» uyidan 6:0 hisobidagi g'alaba bilan qaytgan «Barselona», Aleish Vidalning o'ta og'ir jarohati natijasida murakkab ahvolga tushib qoldi. Endi jamoada haqiqiy o'ng qanot futbolchisi qolmadi. Bu bilan hammasi tugab qolmadi. Oradan taxminan 2-3 soat vaqt o'tib «Osasuna» futbolchisi «Real»ga qarshi uchrashuvda Vidaldanda jiddiyroq jarohat oldi (asabi bo'shlar havolaga bosib o'tirmaslikni maslahat beramiz). 

Chempionatda «Vilyarreal» ochko yo'qotishda davom etmoqda, «Atletiko» esa o'ziga kelishda davom etmoqda. Mazkur turda Simeone shogirdlari katta qiyinchiliklar evaziga bo'lsada, g'alabani o'z tomoniga og'dirishga muvaffaq bo'ldi.

O'ziga o'xshamayotgan Italiya
Odatda himoyaviy taktik futbol bilan ko'pchilikni e'tiborida bo'lib kelayotgan Italiya chempionati ikki turki, bu nomga butunlay teskari yo'ldan bormoqda. Masalan yakshanba kuni bir vaqtda bo'lib o'tgan uchrashuvda jami 18ta gol kiritildi. Shunga yarasha, to'purarlar poygasidagi kurash yanada qiziqarli kechmoqda.

Etakchi «Yuventus»ni esa hech narsa qiziqtirayotgani yo'q. Allegri shogirdlari 1:0, yoki 2:0 kabi hisoblardagi g'alabalar evaziga navbatdagi skudetto sari olg'a borishda davom etmoqda. «Roma» va «Napoli» esa turinliklarni ilgarilab ketishi uchun yo'l qo'ymaslikka harakat qilishmoqda. Bu yoqda «Inter» ham yana o'zining g'alabali yurishini qaytadan boshlagan.

Italiyaning quyi divizionida ham etiborga molik voqealar sodir bo'lib turibdi. Misol uchun hafta oxirida «Perudja» futbolchisi kiritgan gol yilning eng chiroylisi bo'lishga da'vogarlik qilishi shubhasiz.

O'sha o'sha «nemis mashinasi»
Germaniyada esa «Bavariya»dan hamma etakchilar ochko yo'qotdi. Myunxenliklar so'nggi daqiqalarda o'z vaqtida «nemis mashinasi» bo'lganini eslab qolishdi.

«Leyptsig» o'z uyida austayderdan yirik hisobada mag'lub bo'ldi. «Borussiya» mehmonda yutqazdi. «Hoffenhaym» esa «Volfsburg»da mavsumdagi ikkinchi mag'lubiyatini tan olishga majbur bo'ldi. Endi «Bavariya»ning chempionligiga xalaqit beradigan jamoa deyarli qolmadi.

Gol urishdan charchamayotgan «Monako»
Frantsiyada esa hammasi o'z o'rnida davom etmoqda. «Monako» raqiblariga istagancha gol uryapti, «PSJ» va «Nitstsa» esa ularni izma-iz ta'qib qilishda davom etmoqda. 

Bir so'z bilan aytganda uik-end voqealarga boy bo'ldi. Joriy haftadan boshlab esa nafaqat uik-end, hafta o'rtasi ham futbol bayramiga aylanishi kutilmoqda. Sababi Evropada chempionlar ligasi pley-off bosqichi start olmoqda. Tribuna.Uz ularni yoritishda, eng muhim voqealar, natijalar, videolarni e'tiboringizga havola etishda davom etadi. 

Teglar: ispaniyadagi, dahshatlar, «chelsi»ning, ochko, yoqotishi, sermahsul, italiya, uik-endning, yorqin, lahzalari,
← OldingaOrqaga →