"Lokomotiv": Faxriy-u nuroniylar hamisha izzatda

Mazkur yangilik keng jamoatchilik vakillarida ijobiy taassurot qoldirdi. Buni klub elektron pochtasiga kelayotgan xatlar misolida ham ko'rib turibmiz. Jumladan, shunday xatlardan biri O'zbekiston faxriylarining ijtimoiy faoliyatini qo'llab-quvvatlash “Nuroniy” jamg'armasi tomonidan yuborildi. Xatda quyidagicha fikr bildirib o'tilgan:
 
“Lokomotiv” futbol klubi mamlakatimiz va xalqaro arenada o'z o'rniga ega jamoadir. Mamlakatimizda millionlar o'yini bo'lgan futbol ishqibozlarining safi ham kengayib bormoqda. O'tkazilayotgan mamlakat kubogi, osiyo va milliy chempionatlar keksa yoshdagi faxriylarimizni ham befarq qoldirayotgani yo'q. Futbol musobaqalarida yoshi ulug', keksa yoshdagi futbol muxlislarini o'z jamoalarini qo'llab-quvvatlashi hamda faol hordiq chiqarishlari uchun stadionga tashriflarini bepul qilingani uchun nuroniylar nomidan minnatdorchilik bildirib, sevimli “Lokomotiv” jamoasiga yangi zafarlar tilaymiz”, deyiladi xabar matnida.

Jamoa tomonidan amalga oshirilayotgan bunday loyihalar jamoatchilik vakillariga manzur bo'layotganidan mamnunmiz. SHu o'rinda takidlab o'tamiz, “Lokomotiv” ishqibozlari uchun mavsumiy uchrashuvlarning yillik abonementi ham yaqin oradan boshlab sotuvga chiqadi.