Davron Fayziev: "So'g'diyona"ning yangi mavsum uchun tarkibi 60 foizga aniq"

"Ikkinchi yig'indagi oxirgi nazorat uchrashuvini o'tkazdik. Birinchi bo'limdan ko'nglim to'ldi. Ikkinchi bo'limda asosan yoshlar maydonga tushishdi. Elyor Orifov, Izzatilla Abdullaev va Sunnatilla Mamadaliev kabi futbolchilar "Buxoro" bilan bahsda ishtirok eta olishmadi. Ular tibbiy ko'rikdan qaytadan o'tishlari kerak.

Yoshlar bahs oxirida biroz tajribasizlik qilishdi va gol o'tkazib yubordik.

Uchinchi yig'inimiz Toshkentda 24 fevral kuni boshlanadi. 8 martgacha shu erda bo'lamiz. Sababi oliy liganing dastlabki 2ta o'yinimizni ham Toshkentda O'zbekiston chempioni va vice-chempioniga qarshi o'ynaymiz.

"Bunyodkor" va "Lokomotiv" OCHL doirasida o'yin o'tkazishadi. Ularning o'yinlarini kuzatamiz va tahlil qilamiz. Xalqaro musobaqada O'zbekiston sharafini himoya qilayotgan ikkala jamoamizni ham qo'llab quvvatlaymiz. Ularda bizga nisbatan o'yin amaliyoti ko'proq bo'lishi turgan gap. Biz ham qarab turmaymiz va munosib tayyorgarlik ko'rishga urinamiz.

"Mashal" bilan o'yin bekor qilindi. Sababi biz ular bilan tabiiy maydonda o'ynamoqchi edik. Ob-havo noqulay kelgani uchun bahsni bekor qilishga majbur bo'ldik. Uchinchi yig'inda birinchi liganing "Cementchi" klubiga qarshi o'rtoqlik uchrashuvi o'tkazishimiz aniq.

Tarkibimiz 60 foizga aniq bo'ldi deyishim mumkin. Bugun birinchi bo'limda tushganlar jamoada qolishlari aniq, ikkinchi taymda o'ynaganlarning taqdiri esa hozircha nomalum. Ularning uchinchi yig'indagi harakatlariga qarab shartnoma taklif qilamiz yoki xayrlashamiz, - deydi Davron Fayziev.