Ryuji Sato bizning jamoalar uchun qanchalik omadli?

SHu tariqa, Ryuji Sato sakkizinchi bor o'zbek jamoalari ishtirokidagi o'yinda ishlaydi. 1977 yilda tug'ilgan yaponiyalik ushbu hakam 2009 yildan xalqaro o'yinlarni boshqarishni boshlagan.

2014 yil U-19 Yoshlar o'rtasidagi Osiyo chempionati guruh bosqichi doirasida O'zbekiston BAA bilan 2:2 hisobida durang o'ynagandi.

Ushbu hakam 2015 yil Janubiy Koreya - O'zbekiston o'rtasidagi o'rtoqlik uchrashuvida ham ishlagandi. Uchrashuvda Zohir Qo'ziboev gol urgandi va bahs 1:1 hisobida tugagandi.

2015 yil Sato OCHL guruh bosqichi doirasida "Lokomotiv"ning "Fulad"ga qarshi uchrashuvida hakamlik qilgan. O'sha uchrashuv ham 1:1 hisobida tugagandi.

O'tgan yil Ryuji bir yo'la ikki bor o'zbek klublari ishtirokidagi uchrashuvni boshqarib bordi.

OCHL 1-turi doirasidagi "Al Ahli" - "Nasaf" o'yinida "ajdarlar" 1:2 hisobida yutqazib qo'yishgandi. O'sha o'yinda hakam Erkin Boydullaevga qizil kartochka ko'rsatgan va Dilshod Rahmatullaevga nisbatan ishlatilgan qo'pollikni etiborsiz qoldirgandi. 3-turdan o'rin olgan "Sepaxon" - "Lokomotiv" uchrashuvida "temiryo'lchilar" Marat Bikmaev va Sardor Mirzaevning gollari evaziga zafar quchishgandi - 2:0.

Bir yil oldin 24 mart kuni O'zbekiston - Filippin uchrashuvida ham shu hakam faoliyat olib borgan. O'sha bahsda Anzur Ismoilov tomonidan urilgan yagona gol O'zbekistonga g'alaba keltirgandi - 1:0.

Nihoyat 1 sentyabr kuni O'zbekiston va Suriya o'rtasidagi bahsda Satoning xushtagi biz uchun omadli bo'lgan. Geynrixning goli va o'sha mashhur selfi - 1:0.

Osiyo CHempionlar ligasi-2017
"S" guruhi, 1-tur
21 fevral. Jidda
"Sport Siti" stadioni. 22:15 (Toshkent vaqti)
"AL-AHLI" (Saudiya Arabistoni) - "BUNYODKOR" (O'zbekiston)
Bosh hakam: Ryuji Sato
Qanot hakamlari: Toru Sagara, Xiroshi Yamauchi
Zaxira hakami: Araki Yusuke (barchasi - Yaponiya)
Hakamlar nazoratchisi: Adnan Ismoil Alhafi (Iordaniya)
Uchrashuv komissari: Song Xuang (Xitoy)