JCH–2018 saralashi. Suriya – O'zbekiston uchrashuvi BAAlik hakamlar guruhiga topshirildi

Mazkur o'yinni BAAlik hakamlar guruhi boshqarib boradi. Abdulla Muhammad Hasan uchrashuv bosh hakami etib tayinlandi. Unga qanotlarda Muhammad al-Hammadiy hamda Hasan al-Mahriy yordam beradi. To'rtinchi hakam vazifasi Ahmad Hamis al-Naqbiyga topshirildi.

Hakamlar nazoratchisi sifatida avstraliyalik Edvard MakGregor ish olib boradi. Uchrashuv komissari – Xin CHyong (Gong Kong). Xitoylik Syaolong Deng OFK vakili sifatida o'yinga taklif etildi.

Suriya va O'zbekiston o'rtasidagi uchrashuv 23 mart, payshanba kuni bo'lib o'tadi. Uchrashuvda Suriya nominal mezbon bo'lgani hamda mamlakatda siyosiy barqarorsizlik hukmronlik qilayotgani sababli OFK o'yinni neytral zona – Malayziyada o'tkazilishini taminladi.

Mazkur bellashuv Malayziyaning Seremban shahridagi Tuanku Abdul Rahman Stadium stadionida bo'lib o'tadi. O'yin mahalliy vaqt bilan 20:00 (Toshkent vaqti bilan 17:00)da start olishi rejalashtirilgan.

Eslatib o'tamiz, O'zbekiston terma jamoasi JCH–2018 saralash bosqichi “A” guruhi 5-turidan keyin 9 ochko bilan uchinchi o'rinda bormoqda. Suriya 5 ochko to'plagan holda to'rtinchi o'rinni band qilib turibdi.