8 mart kuni xotin-qizlarga “Lokomotiv” – “So'g'diyona” uchrashuvini tomosha qilish bepul bo'ladi

Mazkur bellashuv “Lokomotiv”ning milliy chempionat doirasidagi yangi mavsum hisobidan ilk uy o'yini bo'lgani bois “Temiryo'lchilar” jamoasi ushbu uchrashuvga katta tayyorgarlik ishlarini olib bormoqda. O'yin 8 mart – Xalqaro xotin-qizlar bayrami nishonlanadigan sanada o'tishi sababli shu kuni stadionimizga tashrif buyuradigan go'zal hilqat vakilalariga bir qator syurprizlar hozirlab qo'yildi.

Barcha ayollarga “Lokomotiv” – “So'g'diyona” uchrashuvini tomosha qilish uchun stadionga kirish bepul bo'ladi. Qolaversa, uchrashuv boshlanishi arafasida va tanaffus vaqtida elimiz suygan sanatkorlar ishtirokida koncert dasturi o'tkaziladi.

SHuningdek, shu kuni poytaxtimizdagi mehribonlik uylaridan biri tarbiyalanuvchilari o'yinga tashrif buyurishadi. Ular o'yin boshlanishi arafasida har ikki jamoa futbolchilariga maydonga chiqib kelishda hamroxlik qilishadi.

8 mart kuni barcha futbol ishqibozlarini “Lokomotiv” stadionida kutamiz! Keling, “millionlar o'yini”dan zavqlaning, yangi “futbol mavsumi havosi”dan nafas oling!