Oliy liga. 2-tur prevyusi

Lokomotiv (Toshkent) – So'g'diyona (Jizzax)
8 mart 2017. Toshkent. "Lokomotiv" stadioni. 16:00
Hakamlar: SHerzod Qosimov (Toshkent), Rasuljon Fozilov (Namangan), Mo'minjon Majidov (Namangan), Komiljon Rasulov (Qarshi)
Nazoratchi: Marat Ismoilov Toshkent).
O'zPFL vakili: Valeriy Lyotkin.


O'zbekiston chempioni ilk turda Muborakda “Mashal”ni 1:0 hisobida mag'lub etib qaytdi. Jizzaxning “So'g'diyona” klubi esa mavsumni Toshkentda “Bunyodkor”ga qarshi 0:1 hisobidagi mag'lubiyat bilan boshladi. Davron Fayziev boshchiligidagi jamoa chempionatni vice-chempion va chempionga qarshi safardagi o'yinlar bilan boshlamoqda. Mehmonlar safida “Lokomotiv”ga tegishli darvozabon Sarvar Karimov harakat qiladi.

"So'g'diyona" oxirgi marta 2008 yil "Lokomotiv" ustidan g'olib chiqqan. Yani ketma-ket 11ta uchrashuvda "Lokomotiv" ushbu raqibga yutqazmay kelmoqda.

LOKOMOTIV	Ko'rsatkich	SO'G'DIYONA
18	O'yin	18
13	Yutuq	2
3	Durang	3
2	Mag'lubiyat	13
45	Gol urgan	11
11	Gol o'tkazgan	45
42	Ochko	9

Dinamo (Samarqand) – SHo'rtan (G'uzor)
8 mart 2017. Samarqand. "Dinamo" stadioni. 16:00
Hakamlar: Vadim Agishev (Toshkent), Timur Galeev (Toshkent), Akbar Po'latov (Toshkent), Anatoliy Rubakov (Toshkent)
Nazoratchi: Dmitriy Roman (Toshkent).
O'zPFL vakili: Aleksey Frolov.

Birinchi tur sensaciyasini qayd etgan Samarqandning “Dinamo” klubi 2-turni o'z uyida “SHo'rtan”ga qarshi o'tkazadi. Oliy ligaga qaytgan jamoa Bekobodda “Metallurg”ni 2:0 hisobida mag'lub etishga erishdi. G'uzor klubi ham mavsumni 3 ochko bilan boshladi. Volkov shogirdlari o'z maydonida “Neftchi”dan ustun kelishdi – 1:0. Mana shu uchrashuvda gol urgan Eldor Boymatov Samarqanddagi bahsda ishtirok eta olmaydi. Sababi u “Neftchi” bilan o'yinda qizil kartochka oldi.

Samarqandning "Dinamo" klubi "SHo'rtan" bilan o'z maydonidagi oxirgi olti uchrashuvda umuman yutqazmagan. So'nggi bor "SHo'rtan" bu jamoa maydonidan 2008 yilda zafar quchgandi.

DINAMO	Ko'rsatkich	SHO'RTAN
20	O'yin	20
8	Yutuq	8
4	Durang	4
8	Mag'lubiyat	8
27	Gol urgan	26
26	Gol o'tkazgan	27
28	Ochko	28

 
Neftchi (Farg'ona) – Paxtakor (Toshkent)
8 mart 2017. Farg'ona. "Istiqlol" stadioni. 15:00
Hakamlar: Rustam Bobomurodov (Navoiy), Artem Kalinin (Qarshi), Andrey Capenko (Toshkent vil.), Davlet Jalimov (Nukus)
Nazoratchi: Rashid Aytekov (Toshkent).
O'zPFL vakili: Ahrol Inoyatov (Toshkent).

O'zbek “el klasiko”si deb ataladigan bahs turning markaziy o'yini bo'lishi kutilmoqda. Oliy ligani umuman tark etmagan ikki klub o'rtasidagi uchrashuv Farg'onada bo'lib o'tadi. “Neftchi” ilk turda G'uzorda 0:1 hisobida mag'lubiyat alamini totib ko'rdi. “Paxtakor” esa mavsumni o'z uyida “Qizilqum” ustidan g'alaba bilan boshladi – 3:1. “SHerlar” azosi Jamshid Iskanderov ikkita gol bilan ayni paytda chempionat to'purari bo'lib turibdi.

O'tgan mavsum Toshkentdagi o'yinda "Neftchi" 2:1 hisobida zafar quchgan. Farg'onada esa mezbonlar 1:0 hisobida ustun kelishgan. Nihoyat 2015 yil Farg'onada o'tgan uchrashuvda ham "Neftchi" g'olib bo'lgan - 3:2. So'nggi bor "sherlar" 2015 yilgi mavsumda o'z uyidagi bahsda g'olib chiqqandi.

NEFTCHI	Ko'rsatkich	PAXTAKOR
50	O'yin	50
20	Yutuq	23
7	Durang	7
23	Mag'lubiyat	20
66	Gol urgan	81
81	Gol o'tkazgan	66
67	Ochko	76

 
Olmaliq (Olmaliq) – Bunyodkor (Toshkent)
9 mart 2017. Olmaliq. "OKMK" stadioni. 17:30
Hakamlar: Hasan Ro'ziev (Toshkent), Olim Abduvosilov (Toshkent), Sanjar SHoyusupov (Toshkent), Olim To'ychiboev (Farg'ona)
Nazoratchi: Artyom Arutyunov (Toshkent).
O'zPFL vakili: Noil Lutfulin.

“Olmaliq” chempionatni Buxoroda boshladi. Viktor Kumikov shogirdlari safarda 0:1 hisobida imkoniyatni boy berib qo'yishdi. “Bunyodkor” esa Toshkentda “So'g'diyona” darvozasiga bitta gol urib g'alabaga erishdi. “Olmaliq” safida o'ynayotgan Akbar To'raev, Dilshod Jo'raev, Islom Inomov, Zabihillo O'rinboev, Alibobo Rahmatullaev, Abduqahhor Xojiakbarov, Kamoliddin Murzoev o'z vaqtida “Bunyodkor” tarkibida o'ynashgan.

Bu jamoalar o'rtasidagi so'nggi 7ta uchrashuvda "Bunyodkor" 5ta g'alaba va 2ta durang qayd etgan. "Olmaliq" oxirgi marta 2013 yilgi mavsumda "qaldirg'ochlar"dan ustun kelgandi.

OLMALIQ	Ko'rsatkich	BUNYODKOR
18	O'yin	18
2	Yutuq	13
3	Durang	3
13	Mag'lubiyat	2
17	Gol urgan	37
37	Gol o'tkazgan	17
9	Ochko	42

Nasaf (Qarshi) – Buxoro (Buxoro)
9 mart 2017. G'uzor. "G'uzor" stadioni. 16:00
Hakamlar: Timur To'xtasinov (Andijon), Ziyodullo Abdurahmonov (Andijon), Anvarjon Marajabov (Andijon), Asker Najafaliev (Toshkent)
Nazoratchi: Radik Serazetdinov (Toshkent).
O'zPFL vakili: Roman CHernikov.

O'tgan mavsum bronza medali uchun kurash olib borgan ikki klub G'uzorda to'qnash kelishadi. Qarshidagi “Markaziy” stadion tamirlanayotgani uchun PFL “Nasaf”ning uy o'yinlarini G'uzorda o'tkazishini belgiladi. Ikkala jamoa ham mavsumni g'alaba bilan boshladi. Ro'ziqul Berdiev boshchiligidagi “ajdarlar” Qo'qondan 2:1 hisobidagi g'alaba bilan qaytishdi, Ulug'bek Baqoev shogirdlari esa o'z muxlislari qarshisida “Olmaliq”dan ustun kelishdi – 1:0.  

"Buxoro" oxirgi o'yinlarda "Nasaf" darvozasiga yo'l topa olmayapti. So'nggi bor buxoroliklar oliy ligada bu jamoa darvozasiga 2013 yilgi mavsumda gol urishgandi. SHundan keyin bo'lib o'tgan olti o'yinda "Buxoro" "Nasaf"ga umuman to'p kiritmadi. 

NASAF	Ko'rsatkich	BUXORO
38	O'yin	38
20	Yutuq	9
9	Durang	9
9	Mag'lubiyat	20
67	Gol urgan	37
37	Gol o'tkazgan	67
69	Ochko	36

Mashal (Muborak) – Metallurg (Bekobod)
10 mart 2017. Muborak. Bahrom Vafoev nomidagi stadion.
Hakamlar: Zokir Qodirov (Navoiy), Obid Jumaev (Navoiy), Ruslan Samandarov (Navoiy), Akobir SHukurullaev (Toshkent)
Nazoratchi: Ibrohim SHaripov (Buxoro).
O'zPFL vakili: Grigoriy Rtveladze.

CHempionatni mag'lubiyat bilan boshlagan ikki klub to'qnashuvi. “Mashal” ilk turda amaldagi chempion “Lokomotiv”ga 0:1 hisobida yutqazib qo'ydi. “Metallurg” ham o'z maydonida “Dinamo”ga mag'lub bo'ldi – 0:2. Bosh hakam Zokir Qodirov bir yil oldin ham 2-turdan o'rin olgan “Mashal” – “Metallurg” uchrashuvida ham ishlagandi. O'sha bahsda mehmonlar 3:1 hisobida g'alaba qozonishgandi.

"Mashal" so'nggi bor "Metallurg"ni 2014 yilgi mavsumda taslim qilgandi. Oxirgi beshta uchrashuvda muborakliklar bu raqib ustidan g'alaba qozona olishmayapti. O'tgan yil “Metallurg” o'z maydonida “Mashal”ni 6:0 hisobida tor-mor etgandi. 

MASH'AL	Ko'rsatkich	METALLURG
28	O'yin	28
12	Yutuq	9
7	Durang	7
9	Mag'lubiyat	12
47	Gol urgan	43
43	Gol o'tkazgan	47
43	Ochko	34

 
Qizilqum (Navoiy) – Navbahor (Namangan)
10 mart 2017. Navoiy. "Yoshlik" stadioni. 17:00
Hakamlar: Viktor Serazetdinov (Toshkent), Aleksandr Sidorov (Toshkent), Donier Saylalov (Toshkent), Ahrol Risqullaev (Toshkent)
Nazoratchi: G'ayrat Karimov (Toshkent).
O'zPFL vakili: Bobur Haydarov.
 
Navoiyning “Qizilqum” klubi chempionatni safarda “Paxtakor”dan uchralgan mag'lubiyat bilan boshladi – 1:3. “Navbahor” esa Namanganda “Obod”ni taslim qildi – 2:1.

O'tgan yil bu klublar o'rtasidagi ikkala o'yinda ham "Qizilqum" 3 ochkoga ega chiqqan. Hamidjon Aktamov jamoasi Navoyida 1:0, Namanganda 2:0 hisobida zafar quchgan. "Lochinlar" ushbu jamoani safarda so'nggi bor 2013 yilgi mavsumda mag'lub eta olishgan.

Ikkala klub tarkibida ham birinchi turda yangi futbolchilar gol urishga erishishdi. “Qizilqum” safida “Nasaf”dan o'tgan Azamat Allaniyazov to'p kiritgan bo'lsa, “Navbahor”da “Mashal”dan transfer qilingan G'iyosjon Komilov va Mirzohid G'ofurov gol urishdi.

QIZILQUM	Ko'rsatkich	NAVBAHOR
34	O'yin	34
11	Yutuq	12
11	Durang	11
12	Mag'lubiyat	11
37	Gol urgan	43
43	Gol o'tkazgan	37
44	Ochko	47

Obod (Toshkent) – Qo'qon-1912 (Qo'qon)
10 mart 2017. Toshkent. "Jar" stadioni. 16:00
Hakamlar: Aziz Asimov (Toshkent), Mamur Saidqosimov (Toshkent), Bobur Qodirov (Buxoro), Ishoq Ibragimov (Nukus)
Nazoratchi: Gali Imomov (Toshkent).
O'zPFL vakili: Farhod Magametov.

2017 yilgi chempionatni mag'lubiyat bilan boshlagan navbatdagi ikki klublar to'qnashuvi Toshkentdagi “Jar” stadionida bo'lib o'tadi.

O'tgan yil oliy ligada debyut qilgan "Obod" klubi "Qo'qon-1912" bilan ikki marta o'yin o'tkazishgan. O'z maydonida o'ynagan jamoa g'olib bo'lgan. Yani ushbu jamoalar o'rtasidagi bahslarda hozirgacha durang kuzatilmagan.

OBOD	Ko'rsatkich	QO'QON-1912
2	O'yin	2
1	Yutuq	1
0	Durang	0
1	Mag'lubiyat	1
2	Gol urgan	2
2	Gol o'tkazgan	2
3	Ochko	3

Narzulla Saydullaev tayyorladi