“Lokomotiv” PFK yangi futbolchilarni tanishtirdi (+FOTO)

Bugun “Lokomotiv” stadioni matbuot anjumanlari zalida yangi futbolchilarning tanishtiruv marosimi o'tkazildi.

Tanishtiruv marosimida “Lokomotiv” PFK Bosh direktor o'rinbosari To'labek Akramov, jamoa bosh murabbiyi Andrey Miklyaev, jamoa murabbiyi Mirko Yelichich, shuningdek yangi mavsum oldidan jamoamiz safiga kelib qo'shilgan futbolchilar – Salamat Qutiboev, SHuhrat Muhammadiev, Diyor Turopov, Jaloliddin Masharipov, Murod Bobojonov, Muhammad Kone, Nore Krizo hamda OAV vakillari ishtirok etishdi.

Dastavval “Lokomotiv” PFK Bosh direktor o'rinbosari To'labek Akramov so'zga chiqib, jamoa oldiga qo'yilayotgan vazifalarga to'xtalib o'tdi:
– “Lokomotiv” – O'zbekistonning amaldagi chempioni va Kubogi sohibi hisoblanadi. Jamoamiz oldiga yangi mavsumda ham kamida o'tgan yilgi natijalarni takrorlash hamda Osiyo CHempionlar Ligasida finalga qadar etib borish vazifasi qo'yilgan. SHunga monand ravishda tarkibni kuchaytirish ishlari olib borildi. To'g'ri, yangi mavsum oldidan jamoamizni bir qator tajribali futbolchilar tark etishdi. Biroq yangi kelganlar ularning o'rinlarini bilintirmasligiga ishonamiz, – deya aytib o'tdi To'labek Akramov.







So'ng jamoa murabbiylari – Andrey Miklyaev hamda Mirko Yelichich yangi kelgan futbolchilar xususida to'xtalib o'tishdi.
– “Lokomotiv” jamoasi o'z safiga yangi mavsum oldidan ancha tajribali futbolchilarni qo'shib oldi, deya olaman. Zero milliy chempionatimizdan chaqirilgan o'yinchilarning barchasi o'z klublarida etakchi hisoblanishardi. Qolaversa, legioner futbolchilarimiz ham o'zlaridan yomon taassurot qoldirishayotgani yo'q. SHu sababli ham safimizga qo'shilgan har bir futbolchi haqida iliq fikrlar bildira olaman. Umid qilamanki, yangi o'yinchilar jamoa muvaffaqiyatiga o'z munosib hissalarini qo'sha olishadi, – deydi Mirko Yelichich.




Tanishtiruv marosimining birinchi qismida futbolchilarga o'zlari to'p suradigan formalar topshirildi. Formalarni o'z egalariga “Lokomotiv” PFK Bosh direktor o'rinbosari To'labek Akramov topshirdi.