Andrey Miklyaev: "Tezkor gol urganimizda bizga osonroq bo'lardi"

- Barcha ayollarni bayram bilan tabriklayman. O'zimiz kutgan uch ochko olganimizdan xursandman. “So'g'diyona” – ancha shakllangan jamoa. Buni jizzaxliklar “Bunyodkor”ga qarshi bahsda ham ko'rsatishdi. Biz bilan ham o'yinni ushbu jamoa yomon boshlamadi. Tezkor gol urganimizda osonroq bo'lardi. Biz birinchi bo'limda o'zimiz istagandek ko'p xavfli vaziyatlar yarata olmadik. Ikkinchi taymga kelibgina o'zimiz istagandek o'yin namoyish qila boshladik.

Bugun Salamat Qutiboev Muborakdagi bahsda kichik jarohat orttirib olgandi. SHu bois uni maydonga tushirmadik. Oldinda 13 martdagi OCHL doirasidagi muhim bahs kutmoqda. Kone nimaga tushmadi? Bugun shunchaki Yo'ldoshev va To'xtaxo'jaevni himoyada sinab ko'rdik. Hisob ochilmagan paytda qanotlarni kuchaytirishga urindik. SHu bois Zoteevni tushirdik. Bu bizga yakunda foyda keltirdi.

Sadriddin Abdullaev tarkibda o'tkir pas bera oladigan yagona futbolchi. Birinchi bo'limda u Bikmaevga chiroyli pas bergandi. Abdullaev o'yindan o'yinga o'ziga kelib bormoqda. Qutiboev, Aliboev va Turopov kabi yarim himoyachilarimizda jarohat bor, buni ham unutmang. 

Penalti bo'lgan vaziyatga fikrim? 100 foizli penalti edi, raqib to'pga kurashmagandi, - deydi Miklyaev.