“Bunyodkor-2006” Rossiyadagi turnir finalida!

Akmal Risqullaev boshchiligidagi tarbiyalanuvchilarimiz Stavropol o'lkasida Rossiya qahramoni Vladislav Duxin xotirasiga bag'ishlangan xalqaro musobaqada muvaffaqiyatli ishtirok etishmoqda.

Turnirda jami 12ta jamoa 4ta guruhga bo'lingan holda g'oliblik uchun kurashga kirishishgan edi. Birinchi turda vakillarimiz Novopavlovskning “Kaskad” jamoasi ustidan 11:0 hisobida g'alaba qozondi. Gollarga Abdurahmon Abdusamatov (3ta), Abdurahim Ismoilov (3ta), Nikita Karpenko (3ta), Otabek Boltaev va Muslim Jamoliddinov mualliflik qilishdi.

Ikkinchi tur uchrashuvda Stavropolning “Kojannyy myach” klubi bilan kuch sinashildi va unda hisob ochilmadi – 0:0. SHu tariqa, yosh “qaldirg'ochlar” guruhda birinchi o'rin bilan chorak finalga yo'llanma olishdi.

1/4 finalda Astraxanning “Volgar” klubi 1:0 hisobida mag'lubiyatga uchratildi. Uchrashuv taqdirini hal qilgan yagona gol SHamsiddin Tursunmahammadov tomonidan kiritildi.

Yarim final uchrashuvi anchayin qiziqarli va keskin kurashlarga boy tarzda o'tdi. Belgorodning “Raduga” klubiga qarshi kechgan bahsning asosiy qismida kuchlar teng keldi – 1:1. Jamoamizning yagona golini shu kuni o'zining tavallud ayyomini nishonlagan Abdurahim Ismoilov kiritdiyu Asosiy vaqtda durang qayd etilgach, g'olib penaltilar seriyasida aniqlandi. “Lotoreyalar bahsi”da tarbiyalanuvchilarimiz omadliroq chiqishdi va raqibdan 4:2 hisobida ustun kelishdi.

Ertaga mahalliy vaqt bilan 14:00da (Toshkentda 16:00 bo'ladi) hal qiluvchi final uchrashuvi boshlanadi. Unda Akmal Risqullaev boshchiligidagi “Bunyodkor-2003” jamoasi “Krasnodar” klubi tarbiyalanuvchilari bilan kuch sinashadi.

Vakillarimizga final uchrashuvida omad va zafarlar tilab qolamiz.