CHempionlik uchun kurash. Imkoniyat kimda qanday?

"Lokomotiv"ning Qo'qondan durang natija bilan qaytgani peshqadam "Paxtakor" bilan oradagi farqni to'rttaga etkazgandi.

Lekin bu turda "Loko" g'alaba qozondi, "Paxtakor" esa poytaxt derbisida "Bunyodkor"ga mag'lub bo'ldi. Natijada bugungi kunga kelib birinchi o'rindagi "Paxtakor" va ikkinchi o'rindagi "Lokomotiv" o'rtasidagi farq qisqardi va bir ochkoni tashkil etmoqda. Poytaxtning ikki etakchi klubini izma-iz taqib qilib kelayotgan "Nasaf" hisobida esa 60 ochko bor.

SHundan kelib chiqilib chiqib aytadigan bo'lsak, chempionlik masalasi oxirgi turlargacha ochiq qolsa kerak. Sizningcha, bu yil kim O'zbekiston chempioni degan faxrli nomga sazovor bo'ladi? Turnir jadvalidagi hozirgi holatdan kelib chiqib aytganda "Paxtakor"mi, "Lokomotiv"mi yo "Nasaf"mi? Quyida shu haqdagi fikr-mulohazalarni ilgari suramiz.

Avvalo shuni aytish kerak, hali oldinda "Paxtakor" va "Nasaf"ning o'zaro o'yini bor. 29-turga kelib Qarshida har ikkala jamoa o'zaro bahs olib boradi. "Lokomotiv"ga kelsak, "temiryo'lchilar" "Paxtakor" bilan ham, "Nasaf" bilan ham o'ynab bo'lishdi. Va o'zaro o'yinlarda bir xil hisoblar qayd etilgan. Yani, "Lokomotiv" o'z mayldonida "Paxtakor"ni 2:1 hisobida mag'lub etib, safarda xuddi shu hisobda yutqazgan bo'lsa, "Nasaf" bilan kechgan bahsda safarda 0:1 hisobida imkoniyatni boy berib, o'z uyida shu hisobda g'alaba qozongan. Demak, bu borada tenglik bordek.

Yana shuni qo'shimcha qilish lozim, "Bunyodkor" kecha g'alaba qozongan bo'lishiga qaramay, chempionlik uchun kurashdan chetga chiqqan. Ular endi OCHL yo'llanmasi uchun "Neftchi" bilan kimga o'zarga poyga o'ynashadi. SHunday ekan, chempionlik masalasi yuqoridagi uchta klub o'rtasida hal bo'ladi. Endi esa har bir jamoaning keyingi o'yinlariga to'xtalib o'tamiz.

"PAXTAKOR" (63 ochko)
"Paxtakor" mamlakatimizning amaldagi chempioni hisoblanadi. Jamoa hozir ham peshqadam bo'lib turibdi. Ammo "Paxtakor"ning kechagi mag'lubiyati turnir jadvaliga yaxshigina intriga olib kirdi. "Paxtakor"ni keyingi turlarda oson bo'lmagan bahslar kutmoqda. Jamoa avvaliga o'z maydonida "Dinamo"ni qabul qilsa, keyin ikki bor vohaga safar uyushtiradi va "Mashal", "Nasaf"ga qarshi maydonga tushadi. Mana shu ikki uchrashuv ko'p narsaga oydinlik kiritib bersa ajab emas. Ayniqsa, "Nasaf" bilan kechadigan bellashuv ikkala klub uchun ham muhim o'yin bo'ladi. Va nihoyat, oxirgi turga kelib "Paxtakor" o'z maydonida Andijonni qabul qiladi.
 
"Paxtakor"ning keyingi uchrashuvlari:
27-tur. "Paxtakor" - "Dinamo"
28-tur. "Mashal" - "Paxtakor"
29-tur. "Nasaf" - "Paxtakor"
30-tur. "Paxtakor" - "Andijon"

"LOKOMOTIV" (62 ochko)
Aytib o'tganimizdek, "temiryo'lchilar"ni "Paxtakor" bilan faqat bir ochko ajratib turibdi. "Lokomotiv" chempionatning qolgan to'rtta uchrashuvini oliy ligada qolish vazifasini hal qilib qo'ygan jamoalarga qarshi o'tkazadi. Bir so'z bilan aytganda, jadvalning o'rta o'rinlaridan joy olgan klublar bilan o'ynaydi. "Loko" dastlab "Qizilqum" maydoniga safar uyushtiradi, keyin ketma-ket ikki bor o'z maydonida to'p tepadi. Avvaliga "SHo'rtan", keyin "Mashal" "Loko" mehmoni bo'ladi. Oxirgi turni esa toshkentliklar safarda "Navbahor"ga qarshi o'tkazishadi. Ko'rib turganingizdek, "Lokomotiv"ning raqiblari unchalik jiddiy emas va bemalol har to'rttala uchrashuvni klub o'z foydasiga hal qilsa bo'ladi. Agar "Paxtakor" yana qaerdadir "qoqiladigan" bo'lsa, "Loko"da birinchi o'ringa ko'tarilib olish uchun juda qulay imkoniyat yuzaga keladi.

"Lokomotiv"ning keyingi uchrashuvlari:
27-tur. "Qizilqum" - "Lokomotiv"
28-tur. "Lokomotiv" - "SHo'rtan"
29-tur. "Lokomotiv" - "Mashal"
30-tur. "Navbahor" - "Lokomotiv"

"NASAF" (60 ochko)
"Nasaf" ham imi-jimida chempionlik uchun kurashishda davom etmoqda. Buni kimdir sezib, kimdir sezmay qolyapti. "Nasaf" "Paxtakor"dan 3 ochkoga, "Loko"dan esa ikki ochkoga ortda boryapti. Demak, jamoada chempionlik uchun imkoniyat bor, biroq "Nasaf"ni buyog'iga nihoyatda qiyin bellashuvlar kutib turibdi. Jamoa o'z maydonidagi oxirgi ikkala uchrashuvni ham kuchli klublarga qarshi o'tkazadi. Dastlab "Bunyodkor", keyin "Paxtakor" Qarshida mehmon bo'ladi. Qolaversa, "Nasaf"ning safarda kechadigan o'yinlari ham oson bo'lmaydi. Avvalo "Dinamo" oliy ligada qolish uchun "Nasaf"ga astoydil qarshilik ko'rsatsa ajab emas. Oxirgi turda esa qarshiliklar qo'shni Muborakka safar qilishadi va voha derbisida "Mashal"ga qarshi bahs olib borishadi. Derbi, o'z nomi bilan derbi. Bunda kim g'alaba qozonishini oldindan aytish qiyin. Demak, birmuncha qiyin bo'lsa-da, "Nasaf"da ham chempionlik uchun imkoniyat mavjud.

"Nasaf"ning keyingi uchrashuvlari:
27-tur. "Nasaf" - "Bunyodkor"
28-tur. "Dinamo" - "Nasaf"
29-tur. "Nasaf" - "Paxtakor"
30-tur. "Mashal" - "Nasaf"

Ko'rib turganingizdek, milliy chempionat tugashiga to'rtta tur qolganida go'yoki hammasi yana boshqatdan boshlanayotgandek. Falonchi jamoa chempion bo'ladi deb birdaniga aytish mushkul. SHunday ekan, buyog'iga ham tur o'yinlarini kuzatishda davom etamiz. Lekin bu yil o'zbek futbolida yangi chempion nomini bilib olsak ajab emas.

X.Xoliqov.