“Olmaliq” hujum qildi, “Mashal” gol urdi va...

YO'QOTISH
O'yindan avval “Olmaliq” tarkibida ikkita jiddiy yo'qotish bor edi. Evgeniy Gogol “Andijon” (2:4) bilan bo'lib o'tgan o'yinda “qizil”, Saidkomil Akbarov esa sariq kartochka (to'rtinchi) olgani uchun 19-turni o'tkazib yuborishga majbur edi. Yo'qotishlar o'rniga Hojiakbarov va Jo'raboev asosiy tarkibdan joy olishdi.  SHuningdek, Zohir Pirimov asosiy tarkibga qo'shildi, “Andijon” bilan o'yinning ilk daqiqalaridan maydonga tushib bitta gol muallifi bo'lgan Alisher SHog'ulomov esa bu safar zaxirada qoldi.

O'z navbatida Xomyakov ham tarkibda o'zgarishlarni amalga oshirdi. “Metallurg”ga qarshi bir tur avval kechgan o'yinda jamoani mag'lubiyatdan qutqarib qolgan Murtazoev Dostonovning o'rniga asosiy tarkibdan joy oldi. Himoyachi SHerzod Fayziev esa bu safar zaxirada qoldi. Uning o'rniga “Olmaliq”qa qarshi o'yinda G'iyos Komilov ishtirok etdi.




19TA BURCHAK ZARBASI
Muborakda “Mashal” 3:1 hisobida g'alaba qozongan edi. SHu boisdan birinchi davradagi alamni olish maqsadida “Olmaliq” ilk daqiqalardanoq etiborni hujumga qaratdi. Muborakliklar esa o'z navbatida himoyaviy taktikani qo'lladilar. “Olmaliq” o'z o'yinini to'liq Salomovga topshirib ulguribdi. Agar uning o'yini chiqsa jamoa g'alaba qozonadi, aksincha bo'lsa ochko yo'qotadi. Ammo Salomovning bir o'zi 11 nafar futbolchi ishini qilib bera olmaydi. Harchand urinmasin, u tomonidan ketma – ket oshirib berilgan burchak to'plariga “Olmaliq”ning bironta futbolchisi aniq “kalla” qo'ya olmadi. 16-daqiqada chap qanotdan hujum uyushtirgan Mirzohid G'ofurov to'pni qarama-qarshi nuqtaga uzatdi. To'p esa to'g'ri Zafar To'raevning oyog'iga kelib tushdi va gol. Bu vaziyatda Xonimqulov hech nima qila olmadi. Aksincha uning hamkasbi Sanjar Quvvatov juda ko'plab vaziyatlarda jamoasining joniga oro kirdi. Faqatgina penaltini qaytara olmadi xolos.

Muxlislar hisobni tenglashishini uzoq kutib qolmadilar. Salomovning bir o'zi ikki nafar futbolchini aldab jarima maydonchasi ichiga kirib kelganida qo'pollik bilan to'xtatildi. Uchrashuvni odilona boshqargan Serazetdinov ikkinlanmay penalti belgiladi. 11 metrlik jarima nuqatasidan bolqonlik Yovanovich unumli foydalanib tabloga o'zgartirish kiritdi, 1-1.




Goldan ruhlangan maydon egalari birinchi bo'lim so'nggiga qadar “Mashal”ni o'z jarima maydonchasi ichida ushlab turishdi. Taym oxiriga qadar Salomov bir nuqtadan jami 11 marta burchak zarbasini amalga oshirdi. O'yin yakuniga qadar burchak to'plarining soni 19 (!)taga etdi. Lekin shulardan birontasi darvozabonga aytarli xavf tug'dirmadi. SHkviringa ishlash uchun tayyor ish bor ko'rinadi. Aksincha, “Mashal”ning 44-daqiqa amalga oshirgan kam sonli burchak zarbalaridan ketma-ket ikkitasi sal qolsa gol bilan yakunlanar edi.

Ikkinchi bo'limda uchrashuvni juda sust o'tkazayotgan Jo'raev o'rniga O'runov tushdi. “Olmaliq”ning hujumi biroz ortdi, ketma-ket hujumlar, ammo gollarni urish mehmonlarga nasib etdi. Xumoyun Murtazoev ikki marotaba qarshi hujumga chiqib ketdi va ikkisida ham darvozabon bilan birga bir holatda gol urdi.

4TA O'YIN, 4TA G'ALABA
Yoshlar ligasini qo'shib hisoblaganda “Mashal” olmaliqliklar bilan bu yil bo'lib o'tgan o'yinlarning to'rttasida ham g'alaba qozondi. Mag'lubiyat SHkvirin jamoasini beshinchi o'rindan 3 ochkoga uzoqlashtirdi, “Mashal”ni esa 11-pog'onadagi o'rnini mustahkamladi.




ZAFAR TO'RAEV...
Bu futbolchini “Gattuzo” deydilar. Sal kam uch mavsum faoliyatini “Olmaliq”da, Igor SHkvirin qo'l ostida o'tkazgan futbolchi o'yin ichida va atrofida o'zining xunuk harakatlari bilan etirozlarga sabab bo'ldi. Uni bunday holatda birini marta ko'rib turganimiz yo'q. Qishki o'quv-yig'inlar va oliy liga o'yinlarida ko'p bora guvohi bo'lyapmizki, raqib futbolchisini atayin jig'iga tegishni besh bahoga bajara oladi. Ikkinchi bo'limda to'pni ololmayotgan jamoadoshiga, “tep oyog'iga” deb baqirganini stadiondagi barcha eshitdi shekili. Uchrashuvdan so'ng esa Salomov bilan aytishdi. To'raevning yonini olaman deb Nosirov o'ziga muammo orttirib oldi.
Aftidan bu futbolchi bilan “Mashal” rahbariyati va murabbiylari jiddiy gaplashib olishlari lozim ko'rinadi. Aks holda, shanba oqshomidagi holat ko'p bora qaytarilaveradi va bundan o'zlarining boshi egilgani qoladi xolos. Yillar davomida to'plangan obro'ni bir deganda uchirib yuborishdan osoni yo'q. SHu o'rinda To'raevga savol bilan murojaat qilsam, ko'za kunda emas kunida sinadi. “Olmaliq”da kecha shunday futbolchi topilmadi, boshqa bironta jamoada o'ziga o'xshagan o'yinchi bo'lsa, bu xatti-harakati uchun qarsillatib tepsa, yoki uning o'zi birovni shunday sindirsa. Singan futbolchini kim boqadi? Klubimi? Hech qanaqasiga, ko'chaga kuzatib qo'yiladi bizning oliy ligamizda. SHu kerakmi? Musht bilan emas, maydonda zo'r bo'lish kerak. SHunda kishining hurmati oshadi, boshqacha aytganda, hurmat qilsang hurmat topasan. Aslida o'yindan keyin e-exeeee nimalar bo'lmadi. Lekin bu haqda yozmaslikni maqul ko'rdim, agar shu maqoladan futbolchi to'g'ri xulosa chiqara olsa!




Uchrashuvning eng yaxshi futbolchisi – Sanjar Quvvatov (“Mashal”).
Hisob 1:1 ko'rinish olgan bir paytda Quvvatov o'yinni o'zgartirib yuborishi mumkin bo'lgan muqarrar goldan jamoasini asrab qoldi. CHamasi 30 metrlardan berilgan kuchli zarba “Mashal” himoyachisiga tegib to'g'ri to'qqizlik tomon yo'naldi, shunda ham Sanjar seyv qilgan holda to'pni maydon tashqarisiga chiqarib yubora oldi. Agar shu vaziyat gol bo'lganida, “Olmaliq” ustunlikni kechagi o'yini bilan berib qo'ymagan bo'lardi.
SHuningdek, Murtazoevni ham alohida qayd etib ketish lozim. Birinchi goliga Bukatkin chiroyli tarzda unga  pas bera olgan edi. “Olmaliq”dan esa Salomov va Inomov boshqalardan ancha ajralib turdilar.




Suratlarning sifati bu safar ancha yaxshi. Menimcha Olmaliqdagi yoritkichlar oliy ligadagi eng zo'ri bo'lsa kerak.

Nodirxo'ja Yuldashev.