O'tkir Yusupov: “Mezbonlar katta kuch bilan o'ynashdi, lekin biz g'olib chiqdik”

 Ushbu g'alabada o'zining ishonchli o'yini bilan katta hissa qo'shgan darvozabonimiz O'tkir Yusupov o'yin haqidagi fikrlarini bildirdi.

- O'yin juda keskin kurashlar ostida o'tdi. Stadionga kelgan muxlislar qiziqarli va tomoshabop futbol guvohiga aylanishdi. Kuchli shamol bo'lgani bois futbolchilar biroz qiyinchiliklarga duch kelishdi. Uchrashuvdan oldin murabbiyimiz o'yin juda qiyin bo'lishini, "So'g'diyona" ochko olish uchun jonini berishini takidlab o'tishgandi. Rostan ham mezbonlar  katta kuch, kuchli ishtiyoq bilan o'ynashdi. Buni juda yaxshi bilardik. Muhimi- kerakli uch ochko egasiga aylandik. Bizda chempionlik uchun imkoniyat saqlanib qolgan va shu sababdan Jizzaxda g'alaba qozonishimiz zarur edi.

- O'yin davomida jamoani bir qator vaziyatlarda goldan saqlab qoldingiz. Umuman ko'rsatgan o'yiningizdan qoniqdingizmi?
- Men o'z o'yinimga baho bera olmayman. Bu darajaga hali chiqqanim yo'q. Murabbiylar nima deyishsa shu. Uchrashuvdan so'ng Eldor Suyunov o'yinimga yaxshi bahor berib, o'tkazib yuborilgan golda to'pga chiqishim kerakligini aytib o'tdi. Denis Ivankov ham o'yinimdan qoniqqanini va kerakli maslahatlarni berib, o'z xatolarimni aytdi. Artur Gevorkyan, Maqsud Karimov  singari tajribali futbolchilar yaxshi harakat qilganimni takidlashdi va ruhlantirishdi. Uchrashuvning debyutidayoq darvoza oldida xavfli vaziyat yuzaga keldi. Bu vaziyatdan jamoani goldan saqlab qolganimdan xursandman. Murabbiyimiz har doim hakam xushtagi yangraganidan so'ng diqqatni o'yinga qaratib, tezda barcha narsaga tayyor turishni, sergaklikni uchrashuv so'nggiga qadar yo'qotmaslikni o'rgatgani qo'l keldi. Endi bor etiborni "Bunyodkor" bilan bo'ladigan o'yinga qaratishimiz zarur. Bu uchrashuvda muxlislarga g'alabani taqdim etishim lozim. CHempionlik poygasi esa so'nggi turga qadar davom etadi.