Yoshlar ligasi. "Navbahor" - “Lokomotiv” 2:1

Ushbu g'alaba orqali yoshlarimiz jamg'arilgan ochkolar sonini 10 taga etkazib olishdi va musobaqa jadvalida 12-o'ringa ko'tarilib olishdi.

Birinchi bo'limda futbolchilarimiz ustunlikni qo'lga olgan holda harakat qilishdi. Hujumkor ruhda to'p surgan vakillarimiz raqib darvozasi oldida xavfli vaziyatlarni yuzaga keltirishdi. O'yin boshlarida Ravshan Xursanov hisobni ochishga yaqin kelgandi. Ravshan jarima maydonchasiga yorib kirib, darvoza tomon zarba yo'lladi. Futbolchimizning o'tkir burchak ostidan tepgan to'pini Rustam Nortojiev maydon tashqarisiga chiqarib yuborishga ulgurdi. Keyingi vaziyatda Timur Tolipovning o'ng qanotdan uzatib bergan to'pini Abduaziz Sultanov darvozaga yo'llay olmadi. Birinchi bo'lim o'rtalarida “Lokomotiv” hujumchisi Bobir Tillaboev gol urishga yaqin kelgandi. Ashurmatov bilan deyarli yakkama-yakka vaziyatga chiqqan “Loko” futbolchisiga Javohir Olimjonov imkon bermadi. 23-daqiqada esa raqib posboni bilan yakkama-yakka vaziyatga chiqqan Sultanov darvozani nishonga olib hisobni ochdi. Bo'lim so'nggida Ravshan Xursanov hisobni 2:0 ko'rinishiga keltirib qo'ydi. Xursanov ham raqib posboni bilan yakkama-yakka vaziyatda darvozani nishonga oldi.

Ikkinchi bo'limda “Lokomotiv” futbolchilari harakatida faollik ko'zga tashlandi. Natijada Ashurmatov qo'riqlayotgan darvoza oldida vaziyatlar yuzaga keltirildi. Darvozabon va himoyachilarimiz hujumlarni bartaraf etish raqibga imkon berishmadi. Vaqt o'tgani sayin futbolchilarimiz vaziyatni tenglashga erishishdi. Gol urish uchun Boydedaev, Xursanov va Tolipovlarda gol urish uchun imkoniyatlar bo'lsada vaziyatlarni golga aylantirishda futbolchilarimizga aniqlik etishmadi. 73-daqiqaga kelib esa mehmonlar Akbar Qo'chqrovning aniq zarbasidan keyin hisobni tenglashtirishdi. Hisobdagi farqni qisqarishi uchrashuvning yakuniy qismini murosasiz ruhda o'tishiga zamin yaratdi. Qarama-qarshi hujumlar tashkil etilgani muxlislarga manzur bo'ldi. Hujumlar davomida futbolchilarimizda g'alabani taminlash imkoniyati ham yuzaga keldi. Bir gal Ahmad Mamadalievning jarima maydonchasiga yorib kirib bergan zarbasidan keyin to'p darvoza to'siniga tegib qaytdi. Qaytgan to'pga Abduaziz Sultonov yaqin masofadan zarba bergan bo'lsada mo'ljalni olishda xatoga yo'l qo'ydi. Mehmonlardan esa Ulug'bek Abdullaev hisobni tenglashtirishga yaqin kelgandi. Uning yakuniy zarbasi ham noaniq bo'ldi.

“Navbahor” – “Lokomotiv” – 2:1 (2:0). 3 may. Namangan. “Markaziy” o'yingoh. 978 tomoshabin.
Hakamlar: B.Yulcharaev - 7,8, I.Nosirov - 8,3, M.Nexochin - 8,2, M.Mamatxanov - 8.
Nazoratchi – I.SHaripov.
“Navbahor”: 12. Nodir Ashurmatov, 9. Ilhom Boydedaev, 14. Hojiakbar Yunusov (S), 16. Abduaziz Sultonov, 21. Bilol Toshmirzaev (51. Akbarali Xoldorov, 54), 26. Javohir Olimjonov, 27. Ravshan Xursanov (28. Muzaffar Abdullaev, 90+1), 33. Tohir SHamsitdinov (10. Ilhom Aliboev, 46), 35. Alisher Mirzaev, 88. Abdulaziz Nishanbaev, 99. Timur Tolipov (48. Ahmad Mamadaliev, 74).
“Lokomotiv”: 96. Rustam Nortojiev, 7. Bobir Tillaboev (28. Akbar Qo'chqorov, 56), 8. Jahongir Safarov, 17. SHohruh Mo'minqulov (10. Bek Abdullaev, 46), 18. Rustam Hamroev, 22. Ulug'bek Abdullaev (97. Azamat Adilov, 88), 24. Azizbek Amanov (11. Alisher SHeraliev, 46), 31. Otabek Muhamedov (36. Yusuf SHoimov, 46), 70. Bobir Ergashev (68. Vohid Yunusov, 72), 77. Dilshod Ergashev, 87. Farruh Ibrohimov (S).
Gollar: A.Sultanov (23), R.Xursanov (42) – A.Qo'chqorov (73).
Ogohlantirishlar: H.Yunusov (28), A.Mirzaev (52), A.Sultanov (62) - J.Safarov (33).