Omadli muxlis: "Paxtakor"dan chempionlikni kutib qolaman

28 aprel kuni bo'lib o'tgan "Paxtakor" – "Navbahor" uchrashuvi tanaffus vaqtida o'tkazilgan "Omadli muxlis" akciyasida poytaxtlik Farhod Ummatov asosiy sovrin "Damas" avtoulovi sohibiga aylandi. Vaziyatdan foydalanib, bu inson bilan suhbat uyushtirdik.

Farhod Ummatov ("Omadli muxlis" akciyasi g'olibi) : - Yoshim 55 da. 30 yildan ortiq vaqt davomida "Paxtakor"ga muxlislik qilaman. Imkon bo'lgan vaqtlarda sevimli jamoamni stadionga kelib quvvatlash menga odat bo'lib qolgan. To'g'risini aytsam, bunday akciyalarga ishonmasdim, lekin 28 aprel kuni ham qo'shnim bilan futbol haqida suxbatlashib qoldim. Gapni ko'paytirmasdan suhbatimizni "Paxtakor" stadionida davom ettirish taklifi ikkimizga manzur keldi va stadionga yo'l oldik. O'zim "Paxtakor" stadionidan uzoq bo'lmagan joyda istiqomat qilaman.

Qo'shnim o'tgan uchrashuvda "Omadli muxlis" akciyasida ishtirok etgani va undan 5 qadam uzoqroqda turgan inson "Damas" avtoulovni yutib ketganligini ko'p gapirdi. Stadionga kelishning asosiy sababi futbol, lekin klub tomonidan muxlislar uchun yaratilgan imkoniyat tahsinga loyiq. Endi o'z mashinamni  farzandimga berib, bu "Damas"ni o'zim haydayman. Vaziyatdan foydalanib, "Paxtakor"ga omad tilab qolaman.