Bugun futbol. "Metallurg" - "So'g'diyona"
/ Kiritdi: BestMaster O'qilgan: 837
Bugun Oliy liganing 10-turidan o'rin olgan beshta uchrashuv bo'lib o'tadi.
Bekobodda "Metallurg" Jizzaxning "So'g'diyona" klubiga qarshi bahs olib boradi. Uchrashuv 17:30da boshlanadi.
Oliy liga. 10-tur. 12 may
Metallurg (Bekobod) – So'g'diyona (Jizzax)
Hakamlar: Z. Qodirov (Navoiy), R. Samandarov (Navoiy), O. Jumaev (Navoiy), K. Rasulov (Qarshi).
Nazoratchi: R. Aytekov (Toshkent).
O'zPFL vakili: B. Haydarov.
O'yindan nima kutyapmiz? "Metallurg" kutilmaganda turnir jadvalida eng oxirgi o'rinni egallab turibdi. Bekobodliklar hisobida atigi bitta g'alaba bor. SHuningdek, ular ikki bor durang o'ynab, beshta uchrashuvda mag'lub bo'lishgan. "So'g'diyona" esa 9ta o'yindan 11 ochko to'plagan holda
10-o'rinni egallab turibdi. Mazkur jamoalar o'rtasida kechadigan bahs haqida nima deyish mumkin? Avvalo o'z maydonida to'p tepayotgan "Metallurg" faqat g'alaba uchun o'ynaydi. CHunki jamoa yana ochko yo'qotadigan bo'lsa, yanada mushkul vaziyatda qoladi. O'z navbatida "So'g'diyona" ham safardan ijobiy natija bilan qaytishga urinib ko'radi.
Fakt: Bugun "Metallurg" joriy mavsum hisobidan o'z maydonidagi beshinchi o'yinini o'tkazadi. Jamoa avvalgi to'rt bellashuvdan faqat bittasida g'alaba qozongan. Rustam Mirsodiqov shogirdlari 4-turda "SHo'rtan"ni 4:2 hisobida mag'lub etishgan. Boshqa o'yinlarda esa jamoa "Navbahor" bilan durang o'ynagan holda "Dinamo" va "Buxoro"ga imkoniyatni boy bergan.
Fakt: SHu paytgacha safarda beshta uchrashuvda maydonga tushgan "So'g'diyona" dastlabki uchtasida mag'lub bo'lib, keyingi ikkita o'yinda durang o'ynadi. Jizzaxliklar "Qizilqum" va "Dinamo" maydonidan bir ochko to'plagan holda qaytishdi. Agar bugun Davron Fayziev shogirdlari g'alaba qozonadigan bo'lsa, bu "So'g'diyona"ning safardagi ilk g'alabasi bo'ladi.
Bilasizmi? "Metallurg" oliy ligada ketma-ket besh o'yindan g'alaba qozona olmayapti. Jamoa hisobida ikki durang va uch mag'lubiyat bor. "So'g'diyona" o'tgan tur "Mashal"ni 3:0 hisobida mag'lub etib, o'ziga xos shov-shuvni yuzaga keltirdi. Ular bungacha uchta uchrashuvdan beri zafar qucha olishmayotgandi.
Bilasizmi? "Metallurg" o'z maydonida "So'g'diyona"ga qarshi oxirgi uchta bahsning ikkitasida g'alaba qozongan. Jamoa o'tgan yil 2:1 hisobi bilan ustun kelgan. 2015 yilgi mavsumda esa g'alaba jizzaxliklar tomonidan bo'lgan.
05.03.2016
"Metallurg" - "So'g'diyona" - 2:1
26.08.2015
"Metallurg" - "So'g'diyona" - 1:2
14.05.2014
"Metallurg" - "So'g'diyona" - 4:2
Bosh sahifaga
287