Bugun futbol. "SHo'rtan" - "Bunyodkor"

SHo'rtan (G'uzor) – Bunyodkor (Toshkent)
Hakamlar: A. Asimov (Toshkent), R. Serazetdinov (Toshkent), B. Qodirov (Buxoro), E. Tursunov (Buxoro).
Nazoratchi: B. Tog'aev (Toshkent).
O'zPFL vakili: N. Lutfulin.

O'yindan nima kutyapmiz? Bugun G'uzorda oxirgi uch turdan beri ishi yurishmayotgan jamoalar o'zaro bahs olib borishadi. Bunday deyishimizning boisi, "SHo'rtan" o'z maydonida "Lokomotiv" va "Paxtakor"ni yutganidan beri keyingi uchta o'yinda faqat mag'lubiyatga uchradi. "Bunyodkor" esa oxirgi uchta bahsning bittasida engilib, ikki bor durang o'ynadi. Bugungi uchrashuvda jamoalarning imkoniyati teng deya olamiz.

Fakt: "SHo'rtan" shu paytgacha o'z maydonida bo'lib o'tgan beshta o'yindan uchtasini g'alaba bilan yakunlagan. G'uzorliklar "Neftchi", "Lokomotiv", "Paxtakor" singari klublarni mag'lub etdi-yu, lekin "Mashal" bilan "Qo'qon-1912"ga yutqazib qo'ydi. Bundan tashqari, "SHo'rtan" barcha uch g'alabasini uydagi o'yinlarda qo'lga kiritgan.

Fakt: "Bunyodkor" "SHo'rtan"dan atigi bir ochko ko'p to'plagan holda turnir jadvalida 11-o'rinda bormoqda. Maboda bugun g'uzorliklar zafar quchishsa, u holda "Bunyodkor"dan o'zib ketishadi.

Fakt: "Bunyodkor" hozircha safarda to'rtta o'yinda maydonga tushib, shundan bittasida g'alaba qozozngan. Jamoa "Neftchi"ni 2:1 hisobida mag'lub etib qaytgan. Qizig'i shundaki, "Bunyodkor"ning uy-safar bellashuvlarida urgan va o'tkazgan gollar nisbati bir xil ko'rsatkichga ega: 3-3.

Bilasizmi? Mirjalol Qosimov bugun uch yillik tanaffusdan yana "Bunyodkor" bosh murabbiyi sifatida futbolchilarga ko'rsatma beradi. Agar bugun "Bunyodkor" g'alaba qozonsa, bu Qosimovning oliy ligada 80-g'alabasi bo'ladi.