Andrey Miklyaev: "Vodiy klublariga qarshi o'ynash doim qiyin bo'lgan"

Uchrashuv yakunlangach har ikki jamoa ustozlari ishtirokida matbuot anjumani tashkil etildi. Uning birinchi qismida “temiryo'lchilar” bosh murabbiyi Andrey Miklyaev qatnashdi va jurnalistlarning savollariga javob qaytardi.

- Farg'ona vodiysida o'ynash har doim ham qiyin bo'lgan. Zero uchrashuvlarda mahalliy jamoalarni ko'psonli ishqibozlar qo'llab-quvvatlab turishadi. SHuni inobatga olgan holda va qolaversa, bugungi raqibimizning so'nggi paytlarda ancha mazmunli o'yin namoyish etayotganini hisobga olib, uchrashuvga hozirlik ko'rgan edik. O'yin kutganimizdek qiyin kechdi. To'p o'tkazib yuborgach, hisobni tenglashtirish uchun urindik. Aytib o'tishim kerakki, bugun ikkala jamoa ham biroz ehtiyotkor tarzda o'yin ko'rsatdi. SHu sababli gol kiritish uchun uncha ko'p vaziyatlar yuzaga kelmadi, - deydi tajribali mutaxassis.