Oliy ligadan kim tushib ketadi?

Hozirda asosiy davogar "Buxoro" klubi bo'lib turibdi. Eng kam ochko "Buxoro"da - 17. "Dinamo"da 22, "So'g'diyona"da 20 ochko mavjud.

"BUXORO"
Keyingi ikki tur "Buxoro" uchun juda qiyin keladi. Safarda "Metallurg"ga qarshi o'yin bor. Bekobodliklar so'nggi 4 turda uch mag'lubiyatga uchrab, turnir jadvalida o'ninchi o'ringa tushib ketdilar. Bu o'yinda "Metallurg" yaqqol favorit. Keyingi turni "Buxoro" safarda OCHL uchun kurash olib borayotgan "Neftchi"ga qarshi o'tkazadi. "Bunyodkor"ning har qanday mag'lubiyati ikki o'yin natijasiga ko'ra "Neftchi"ga OCHLni tuhfa etadi. "Buxoro"ning so'nggi tur o'yini safarda "So'g'diyona"ga qarshi kechadi.

"Buxoro" olishi mumkin bo'lgan ochkolar: 6

"SO'G'DIYONA"
"Buxoro"ga solishtirganda "So'g'diyona"ni juda oson o'yinlar kutib turibdi. 5-o'ringa chiqa olmaydigan, shuningdek, ettinchiga ham tushib ketmaydigan "Olmaliq" 28-turda Jizzaxga tashrif buyuradi. Bu o'yinda Fayziev jamoasi ijobiy natijaga erishishi haqiqatga yaqinroq. Keyingi turda jamoa mavsum - 2015 uchun rejasini ortig'i bilan bajargan "Qo'qon-1912" jamoasi mehmoni bo'ladi. So'nggi turda esa yil o'yini bo'ladi, agar yuqoridagi jamoalardan birontasida "So'g'diyona" bironta ochko ololmasa. Lekin jamoaning "Nasaf"ga qarshi o'tkazgan o'yinidan kelib chiqsa, Jizzaxdagi so'nggi tur o'yinida maydon egalari favorit sanaladilar.

"So'g'diyona" olishi mumkin bo'lgan ochkolar: 6

"DINAMO"
Trio ichida samarqandliklar eng katta imkoniyatga ega klub sanaladilar. O'z maydonida "Bunyodkor"ni enga olmagan "Nasaf" birinchilardan bo'lib OCHL masalasini hal qildi. Klub hech qanaqasiga to'rtinchi o'ringa tushib ketmaydi, yana bitta medal naqd. Bundan "Dinamo" foydalanib olishi mumkin. Keyingi turda jamoa "Andijon" mehmoni bo'ladi. Bu o'yinda ikki jamoani ham durang to'liq qoniqtiradi. So'nggi turda "Olmaliq" Samarqandga safar qiladi. Bu o'yinda Hakimov jamoasi bilan muvaffaqiyatga erishishi mumkin.

"Dinamo" olishi mumkin bo'lgan ochkolar: 4

28-tur
"Metallurg" - "Buxoro"
"So'g'diyona" - "Olmaliq"
"Dinamo" - "Nasaf"
 
29-tur
"Buxoro" - "Neftchi"
"Qo'qon-1912" - "So'g'diyona"
"Andijon" - "Dinamo"

30-tur
"So'g'diyona" - "Buxoro"
"Dinamo" - "Olmaliq"


Agar taxminlar o'zini oqlasa, turnir jadvalining quyi qismi quyidagicha ko'rinish oladi:

"Dinamo" - 26 ochko
"So'g'diyona" - 26 ochko
"Buxoro" - 23 ochko

Agar "Dinamo" va "So'g'diyona" jamoalari o'rtasidagi ochkolar soni teng bo'lib qolsa, o'zaro o'yin natijalariga ko'ra "Dinamo" ustun bo'ladi. Samarqandliklar Jizzaxda 2:1, o'z maydonlarida esa 2:0 hisobida "So'g'diyona"ni mag'lubiyatga uchratganlar.


Nodirxo'ja Yuldashev