Bugun futbol. "Qizilqum" - "Neftchi"

“Qizilqum” (Navoiy) – “Neftchi” (Farg'ona)
Hakamlar: R. Ermatov (Toshkent), A. Rasulov (Toshkent), J. Saidov (Toshkent), SH. Rajabov (Buxoro)
Nazoratchi: A. Popov (Toshkent)
O'zPFL vakili: N. Lutfulin

Jadvaldagi o'rni: "Qizilqum" 13-o'rinda (10 ochko), "Neftchi" 14-o'rinda (9 ochko).

O'yindan nima kutyapmiz? Bugun yana bitta turnir jadvalida yonma-yon o'rinlarni egallab turgan jamoalarning o'zaro to'qnashuvini ko'ramiz. "Qizilqum" avvalgi turda "Lokomotiv"ga imkoniyatni boy berdi. "Neftchi" esa o'z maydonida "Obod"dan ustun keldi. Bugungi bellashuvda "Neftchi" mavsumdagi uchinchi g'alabasini qo'lga kirita oladimi? Yoki bo'lmasa "Qizilqum" zafar quchib ochkolari sonini 13taga etkazadimi?

Fakt: "Qizilqum" bugun o'z maydonida beshinchi uchrashuvda maydonga tushadi. Jamoa bungacha "Navbahor", "Buxoro", "So'g'diyona" va "Nasaf" klublariga qarshi bahs olib borgan.

Bilasizmi? "Qizilqum" shu paytgacha uyda faqat bitta uchrashuvda g'alaba qozongan. Navoiyliklar 2-turda "Navbahor"ni 2:1 hisobida mag'lub etishgan. Uydagi o'yinlarda to'plar nisbati 4-4.

Fakt: "Qizilqum" ketma-ket besh o'yindan beri g'alaba qozona olmayapti: to'rt durang va bir mag'lubiyat.

Fakt: "Neftchi" safarda shu paytgacha faqat bir uchrashuvda g'olib bo'lgan. Jamoa Jizzaxda "So'g'diyona"ni 1:0 hisobida mag'lub etib qaytgan. Umuman olganda, farg'onaliklar oxirgi to'rt o'yinning ikkitasini g'alaba bilan tugatishdi.

Bilasizmi? "Neftchi" safar uchrashuvlarida ikkita gol urib, 7ta to'p o'tkazib yuborgan. Qizig'i shundaki, "Neftchi" safarda gol urgan o'yinlarda hali mag'lub bo'lmagan: yo durang o'ynagan, yo g'alaba qozongan.