Ro'ziqul Berdiev: “Biz derbiga emas, oddiy o'yinga tayyorgarlik ko'rgan edik”

- “Mashal” jamoasi bilan uchrashuvimiz doimo keskin bo'ladi, ular biz bilan bahslashganida juda katta kuch bilan harakat qilishadi. Bugungi o'yin ham shunday bo'ldi. Bevosita o'yin haqida to'xtaladigan bo'lsam, biz bugun Rashidxonovning chiroyli goli evaziga g'alabaga erishdik. O'yinchimiz juda chiroyli gol muallifi bo'ldi. Raqibga bugun gol urishga umuman imkon bermadik. Uchrashuvda biz uchun boshqa qulay vaziyatlar ham bo'ldi. Ammo bu vaziyatlarni golga aylantira olmadik. Muhimi g'alabaga erishdik va uch ochkoni qo'lga kiritdik.

Bugun biz bir necha o'yinchilarimizga dam berdik. SH.Azamovni kichik jarohati borligi tufayli tavakkal qilishni hohlamadik. Qolaversa u muntazam o'yinlarimizda ishtirok etib kelayotgandi. Bugun yana SH.Erkinovni maydonga tushirmasdan B.Abduxoliqov xizmatidan foydalandik. Bunga sabab, o'yinda “Mashal” jamoasi himoyachilarini shoshirib qo'yadigan tezkor hujumchi kerak edi.

Raqibimiz bizga nisbatan bugun qo'polroq harakat qildi. Balki ular o'z oldilariga qo'yilgan vazifadan kelib chiqib, shunday harakat qilishgandir.  Ammo bunday qo'pol harakatlar raqib jamoa o'yinchilari uchun yomon oqibatlarni keltirib chiqarishi mumkin.

Derbi? Biz derbiga emas, oddiy o'yinga tayyorgarlik ko'rgan edik. Maqsadimiz g'alaba qozonish edi. Buni yigitlarimiz uddasidan chiqishdi. Bugun jamoamiz o'zining yana bir mazmunli o'yinini namoyish etdi. SHaxsan bundan mamnunman.