Diyor Turopov: “Lokomotiv”ning muvaffaqiyatiga xissa qo'shayotganimdan xursandman

Mazkur o'yinda “temiryo'lchilar” jamoasi azosi Diyor Turopov 2 bor raqib darvozasini ishg'ol etib, “Loko” tarkibidagi dastlabki gol (lar)ini kiritishga muvaffaq bo'ldi.

Sekin-asta “Lokomotiv” ishqibozlarining yoqimtoylaridan biriga aylanib borayotgan futbolchi ushbu o'yin, shuningdek, oldindagi Oliy Liga 12-tur bellashuvlari doirasidan o'rin olgan “Neftchi”ga qarshi bahs xususida fikrlarini bildirib o'tdi.

– “Qizilqum” bilan o'yinni butun jamoamiz yaxshi o'tkazdi. Murabbiylar bergan ko'rsatmalarni yigitlar aniq bajara olishdi va yakunda chiroyli g'alabaga erishdik. Ushbu g'alabaga men ham o'z xissamni qo'shganimdan juda-juda mamnunman. Ayniqsa, gol kiritgan paytim juda yoqimli hissiyotni boshdan o'tkazdim. Keyingi uchrashuvlarda ham “Loko”ning g'alabalarida o'z ulushim bo'lishiga harakat qilaman.

Oldinda bizni “Neftchi”ga qarshi o'yin kutmoqda. Ushbu bahsga ham jiddiy hozirlik ko'ramiz. Raqib o'yinini tahlil qilgan holda, murabbiylarimiz o'z rejalarini tuzib chiqishadi. Biz esa murabbiylar ko'rsatmalarini maydonda bajarishga urinamiz. Keyingi o'yinlarni ham albatta g'alaba bilan yakunlashga umid qilamiz, – deydi Diyor Turopov klub matbuot xizmatiga.