Bugun futbol. "Dinamo" - "Qizilqum"

18:00 - Dinamo (Samarqand) – Qizilqum (Navoiy)
Hakamlar: V. Serazetdinov (Toshkent), M. Saidqosimov (Toshkent), A. Capenko (Toshkent vil.), N. Qosimov (Qarshi)
Nazoratchi: A. Klepikov (Toshkent).
O'zPFL vakili: A. Inoyatov.

O'yindan nima kutyapmiz? Jamoalarni to'rt ochkolik farq ajratib turibdi. Albatta, raqibiga nisbatan ikkita ko'p g'alabaga erishgan "Dinamo" teparoqda. Bugun Samarqandda qiziqarli o'yin bo'lib o'tishi kutilmoqda. CHunki ikkala jamoaga ham g'alaba nihoyatda zarur. Qolaversa, ikkala jamoa ham oxirgi turlarda uch ochkoli bo'la olmayapti.

Fakt: Bugun "Dinamo" o'z maydonida oltinchi o'yinini o'tkazadi. Jamoa bungacha ikkita bahsda g'alaba qozongan. Ikki bor durang o'ynab, bir marta yutqazib qo'ygan. To'plar nisbati 9-5. "Dinamo" uy uchrashuvlarida 8 ochkoni qo'lga kiritgan.

Fakt: "Qizilqum" safarda bor-yo'g'i bir marta g'alaba qozongan. Navoiyliklar 1:0 hisobida "Bunyodkor"ni mag'lub etishgan. Qolgan o'yinlarda jamoa ikki bor durang o'ynab, uchta bahsda mag'lub bo'lgan. To'plar nisbati 3-7.

Bilasizmi? "Dinamo" ketma-ket besh o'yindan beri g'alaba qozona olmayapti: uch durang, ikki mag'lubiyat. Jamoa oxirgi marta 6-turda "Buxoro"dan 3:1 hisobida ustun kelgan.

Bilasizmi? "Qizilqum" ham yutmaslik bobida bo'sh kelayotgani yo'q, jamoa qatorasiga oltita o'yindan beri yuta olmayapti. Qizig'i shundaki, "Qizilqum" oxirgi oltita o'yindan beshtasini durang bilan yakunlagan.