Oliy liga. 12-turning ikkita o'yinida o'tgan yilgi hisob takrorlandi

Gap shundaki, o'z maydonida "Nasaf"ni qabul qilgan "Metallurg" 1:0 hisobida g'alaba qozondi. O'tgan yil ham Bekobodda kechgan mazkur jamoalarning o'zaro qarama-qarshiligi "Metallurg"ning 1:0 hisobidagi g'alabasi bilan yakun topgandi.

Yana bir shunday voqea "Lokomotiv" - "Neftchi" o'yinida ro'y berdi. "Temiryo'lchilar" o'tgan yil bo'lgani kabi bu safar ham raqibni 4:0 hisobida dog'da qoldirishdi. (Natijada "Neftchi" murabbiylar shtabida o'zgarish ro'y berdi).

Turnir jadvalida "Lokomotiv" 26 ochko bilan peshqadamlik qilishda davom etmoqda. Jamoa uz maydonida ketma-ket oltinchi g'alabasini nishonladi. "Neftchi" esa safarda to'rtinchi marta mag'lub bo'ldi. Bundan tashqari, farg'onaliklar to'rtinchi uchrashuvda ham gol urmasdan yutqazib qo'yishdi.

"Nasaf"ga kelsak, bu jamoa safardagi uchinchi mag'lubiyatini qabul qilib oldi. Jamoa bungacha "Olmaliq" va "Loko"ga imkoniyatni boy bergandi. Agar qarshiliklar shunday o'yin ko'rsatishda davom etishsa, "Nasaf" bu yil ham chempionlikka erisha olmasligi mumkin.

"Metallurg" o'z maydonida qiyin g'alabaga erishdi deya olamiz. Bu bekobodliklarning uydagi uchinchi g'alabasi bo'ldi. Jamoa bungacha "SHo'rtan" va "So'g'diyona"dan ustun kelgandi. Mana endi "Nasaf" ham dog'da qoldirildi. Qo'lga kiritilgan g'alaba "Metallurg"ni 14-o'ringa olib chiqdi.