Oleg Tyulkin: Dinamo trillerda g'olib bo'ldi

- Oleg Pavlovich, keyingi bosqich yo'llanmasi bilan tabriklaymiz. O'yin haqida qanday fikrdasiz?

- Bugun Dinamo o'yin emas, trillerda g'olib bo'ldi. Uchrashuv juda shiddatli va tomoshabop o'tdi. Ayniqsa, birinchi bo'lib hisobni jarima zarbasidan Iskandar Xolmirzaev kiritgandan keyin, o'yin yanada jonlandi. Maydon egalari muvozanatni tiklashgach, har qanday holatda ham yana bitta gol urishimiz kerak edi. Ammo ko'p o'tmay, futbolchilar maydondan chetlatishdi, penalti qo'yildi. 11 metrlik holat bo'yicha vaziyatni anglay olmadim, ochig'i. Raqib penaltidan gol urib, hisobda oldinga chiqqach, yakunda biz yana gol urib, chorak finalga yo'l olganligimizdan juda xursandmiz. Yigitlar irodalarini namoyish etishdi.

- Jasur Qurbonov maydonga tushayotganda qanday ko'rsatma berilgandi?

- Yosh futbolchimiz yarimhimoyachi bo'lsada, hujumkorlikni oshirishi kerak edi. O'yin yakunida uning maydonga tushirilishi foydali bo'ldi. O'yinga qo'shib berilgan 90+6-daqiqa yakuniga 15 soniya qolganida Jasur ikki futbolchini aldab, chamasi 30 metrlardan kuchli zarbasi bilan ajoyib gol muallifiga aylandi. Bu gol bizni chorak finalga olib chiqdi. Yoshlar ishonchimizni oqlayotgan ekan, ularga imkon berishda davom etamiz.

- CHorak finalda Dinamoni Mashalga qarshi ikkita uchrashuv kutib turibdi…

- Olmaliq to'sig'idan o'tdik, endi Mashaldan ham o'tishga intilamiz. Muborak jamoasi ham hurmatga sazovor raqib. Imkonqadar g'alabalar qozonib, finalga chiqishga harakat qilamiz. Bu muxlislarimiz uchun ajoyib sovg'a bo'lardi. Har qanday holatda ham Dinamo har o'yinda kurashib, bor kuch va g'ayratini ishga solishiga vada beramiz.

Dinamo Matbuot xizmati.