Bugun bo'lib o'tadigan o'yin bilan oliy liganing 13-tur bahslari yakunlanadi

19:00 boshlanadigan uchrashuv katta ehtimol bilan "Sport" telekanali orqali efirga uzatilmaydi (na jonli, na yozib olingan holda). Va buning sabablari hozircha bizga malum emas.

Turnir jadvalida "Qo'qon-1912" 23 ochko bilan uchinchi o'rinni egallab turibdi. "Bunyodkor" hisobida esa 12 ochko bor bo'lib, ular 13-o'rinda borishmoqda.

13-turga kelib "Bunyodkor"ning 13-o'rinda borayotgani juda g'alati. Albatta, jamoaning zaxirada bitta o'yini bor, shunga qaramay Mirjalol Qosimov uchun "qaldirg'ochlar"ni yuqoriga ko'tarish oson bo'lmayapti. Bugun "Bunyodkor" o'z maydonida 6-uchrashuvini o'tkazadi. Jamoa avvalgi o'yinlarning faqat bittasida g'olib bo'lgan. "Bunyodkor" o'z uyida "So'g'diyona"ni 1:0 hisobida mag'lub etgan.

Bilasizmi? "Bunyodkor" o'z maydonidagi o'yinlarda bittadan ko'p gol ura olmayapti. Umumiy hisobda to'plar nisbati 4-4. "Bunyodkor" uydagi oxirgi uchta o'yinni bir xil 1:1 hisobi bilan yakunladi. Raqiblar - "Dinamo", "Metallurg" va "Paxtakor".

Fakt: "Bunyodkor" oliy ligada ketmka-ket oltita o'yindan beri g'alaba qozona olmayapti: to'rt durang, ikki mag'lubiyat.

"Qo'qon-1912"ning esa ishlari joyida. Bu jamoa bu yil har doimgidan yaxshi o'yin ko'rsatyapti. Natijada qo'qonliklar bekorga yuqori o'rinlarda borishayotgani yo'q. Bugun ham yaxshi o'yin bo'lishi kutilmoqda. Sababi, "Bunyodkor"ni g'alabadan boshqasi qoniqtirmaydi. "Qo'qon-1912" esa omadli seriyasini davom ettirishga harakat qiladi.

Fakt: Bugungi bahs "Qo'qon-1912" uchun safardagi 6-o'yin bo'ladi. Jamoa avvalgi bellashuvlarning ikkitasini o'z foydasiga hal etgan va uch marta durang o'ynagan. To'plar nisbati 8-6. "Qo'qon-1912" safarda 9 ochkoli bo'lgan.

Bilasizmi? "Qo'qon-1912" safar o'yinlarida hali mag'lub bo'lmagan. Umuman olganda, bu jamoa qatorasiga 11 o'yindan beri yutqazmay kelmoqda. Mana buni natija desa bo'ladi.