Bugun futbol. Bekobodda oxirgi ikkita o'yinni g'alaba bilan tugatgan jamoalar bahsi bo'lib o'tadi

Qizig'i shundaki, bugun Bekobod shahrida oxirgi ikki o'yinni g'alaba bilan yakunlagan jamoalar o'zaro bahs olib borishadi. Bunday deyishimizga sabab, "Metallurg" avvalgi ikkita bahsda g'alabaga erishdi. Jamoa o'z maydonida "Nasaf"ni, safarda "Obod"ni mag'lub etdi.

"Qizilqum" esa safarda "Dinamo"dan va o'z maydonida "Mashal"dan ustun keldi. Ikkala o'yinda ham navoiyliklar o'z darvozalaridan to'p o'tkazib yuborishmadi. Hozirgacha "Qizilqum" ettita o'yinni safarda o'tkazib, shundan ikkitasida g'olib chiqqan. Ikki bor durang o'ynagan bo'lsa, uch marta imkoniyatni boy bergan. To'plar nisbati 4-7.

Bugungi o'yin "Metallurg" uchun uydagi ettinchi uchrashuv bo'ladi. Jamoa bungacha uch marta raqiblarini mag'lub etgan. Bir bor durang o'ynab, ikki marta yutqazib qo'ygan. To'plar nisbati 9-7. 

Bilasizmi? "Qizilqum" oxirgi beshta o'yinning faqat bittasida mag'lub bo'ldi. Navoiyliklar Toshkentda "Lokomotiv"dan 0:2 hisobida engilishgan. Qolgan to'rt uchrashuvda ikki durang va ikki g'alaba qayd etilgan. 

Bilasizmi? "Metallurg" ham oxirgi besh uchrashuvning faqat bittasida imkoniyatni boy bergan. Jamoa "Olmaliq"dan mag'lub bo'lgan. Qolgan o'yinlarda uch g'alaba va bir durang qayd etilgan.