Bugun futbol. Safarda hali g'alaba qozonmagan "So'g'diyona" bugun "Qo'qon-1912" mehmoni bo'ladi

"Qo'qon-1912" birinchi turni mag'lubiyat bilan boshlagandi, shundan keyin jamoa qatorasiga 11 o'yinda mag'lub bo'lmadi. Lekin o'tgan tur qo'qonliklar Toshkentda "Bunyodkor"ga yutqazib qo'yishdi.

Mana endi jamoa o'z maydonida safarda hali g'alaba nimaligini bilmay kelayotgan "So'g'diyona" bilan bahslashadi. "So'g'diyona" shu paytgacha safarda etti bor maydonga tushgan bo'lsa, biror marta g'alabaga erishmagan: ikki durang, besh mag'lubiyat. To'plar nisbati 6-17.

Aytgancha, jizzaxliklar safarda gol o'tkazish bo'yicha birinchi o'rinda borishmoqda. Agar jamoa bugun zafar quchsa, bu Davron Fayziev shogirdlarining safardagi ilk g'alabasi bo'ladi. "Qo'qon-1912" esa o'z maydonidagi o'yinlarning to'rttasida zafar quchgan. Ikki bor durang qayd etgan bo'lsa, bir marta yutqazib qo'ygan. To'plar nisbati 11-6. "Qo'qon-1912" uydagi yagona mag'lubiyatini "Nasaf"dan qabul qilib olgan.

Bilasizmi, "So'g'diyona" Jizzaxdagi oxirgi uchta uchrashuvni g'alaba bilan yakunladi, lekin jamoa ketma-ket ikki bor safardan yutqazib qaytdi. "Qo'qon-1912" esa dastlab ikki bor o'z maydonida durang o'ynadi va oxirgi uy o'yinida g'alaba qozondi.