"Vodiy futboli": "Navbahor" va "Qo'qon-1912" g'alaba qozondi

"Navbahor": Ketma-ket uchinchi g'alaba

28-turda Baxtiyor Ashurmatov shogirdlari o'z maydonida "Qizilqum"ni qabul qildi. Uchrashuvda namangan klubi 2:1 hisobida zafar quchdi. SHunday qilib, "lochinlar"ning g'alabali seriyasi uchta o'yinga etdi. Bundan oldin jamoa "Qo'qon-1912" va "Buxoro" taslim qilingandi.

Keyingi turni "Navbahor" G'uzorda "SHo'rtan" mehmoni bo'ladi.


"Qo'qon-1912": "Neftchi" ilk bor mag'lub etildi

Oliy liganing 28-turida "Neftchi" mehmoni bo'lgan "Qo'qon-1912" 1:0 hisobida zafar quchdi. SHu tariqa, "Qo'qon-1912" o'z tarixida ilk bor oliy ligada "Neftchi"ni mag'lub etishga erishdi. Bugunga qadar “Neftchi” va “Qo'qon-1912” oliy ligada 19 bora to'qnash kelishgandi. “Neftchi” 17ta o'yinda g'olib bo'lgan, 2 marta durang qayd etilgandi. “Qo'qon-1912” bu raqibni umuman mag'lub eta olmagandi.

"Qo'qon-1912" 29-turni "So'g'diyona"ga qarshi o'z maydonida o'tkazadi.


"Andijon": "Bunyodkor"ni umuman mag'lub eta olmaganmiz

Bu ikki klub o'zaro 15 bor kuch sinashishgan. Natijalar “Bunyodkor”ning katta ustunligini ko'rsatmoqda. “Qaldirg'ochlar” 12ta o'yinda g'oliblik nashidasini surishgan. 3ta o'yin durang bilan yakunlangan. “Andijon” o'z tarixida bu raqibni umuman enga olmagan.

“Bunyodkor” Toshkentda o'tgan o'yinlarda 6 marta g'alabaga erishgan. “Burgutlar” bu raqib maydonidan faqat bir bor (2012 yil) durang bilan qaytgan. “Andijon” safarda “Bunyodkor” darvozasiga bitta gol urgan.