Zayniddin Tojiev: Bugungi derbida “Lokomotiv” raqibdan ustunroq ko'rinmoqda

O'z vaqtida “temiryo'lchilar” jamoasi safida mazmunli o'yin namoyish etib, bir qator derbilarda muxlislar olqishiga sazovor bo'lgan sobiq futbolchi Zayniddin Tojiev mazkur o'yin oldidan o'z fikrlari bilan o'rtoqlashdi.

- “Bunyodkor” jamoasi endilikda Mirjalol Qosimov boshchiligida sekin-asta yangicha o'yinni shakllantirib bormoqda. Lekin bugungi bahsda “Lokomotiv”ni raqibdan biroz ustunroq, deb o'ylayman. O'zi aslida derbiga tayyorgarlik odatda biroz boshqacharoq bo'ladi. Men futbol o'ynagan paytda ham shunday edi. “Bunyodkor”ga qarshi kechgan bir nechta derbilarda ishtirok etganman.

Derbida jamoa yutadimi yoki yutqazadimi, baribir kurash so'nggi sekundlarga qadar kechadi. “Bunyodkor” bilan bo'lgan derbilardan yodimda saqlanib qolgani – 2012 yilda ushbu jamoani 3:1 hisobida mag'lub etganimiz. O'shanda Arturas Fomenko 2 ta gol kiritgandi. Adashmasam, Arturas “Bunyodkor”ga qarshi deyarli har bir o'yinida gol kiritishga muvaffaq bo'lardi.

Umuman olganda, derbida g'alabaga erishish har qachon ham muhim bo'lgan. SHu sababli bugun ham o'yin juda shiddatli va qiziqarli tarzda kechishiga aminman, - deydi Tojiev.

Takidlash joizki, Zayniddin Tojiev 2011-2013 mavsumlarda “Lokomotiv” sharafini himoya qilgan.

"Lokomotiv" matbuot xizmati