Bu - qiziq. Oliy ligada "Nasaf"ni yutgan jamoalarning omadi kelyapti

Gap shundaki, "Nasaf"ni kim mag'lubiyatga uchratgan bo'lsa, keyingi turlarda o'sha jamoa juda omadli ishtirok etgan.

Malumot uchun, "Nasaf" hozircha 14 uchrashuvda maydonga tushib, shundan to'rttasida mag'lub bo'ldi. Bu klubning "Bunyodkor"ga qarshi 3-tur bahsi qoldirilgan va o'yin 4 iyul kuni bo'lib o'tadi. Qarshiliklar birinchi davrada uydagi hamma o'yinlarni g'alaba bilan tugatishdi. To'rtta mag'lubiyat esa safardagi bellashuvlarda qayd etildi.

"Nasaf" safarda "Olmaliq" (5-tur), "Lokomotiv" (6-tur), "Metallurg" (12-tur) va "Paxtakor" (14-tur) klublariga imkoniyatni boy berdi. Raqib jamoalarning g'alabasidan so'ng ularda ishtaha ochildi shekilli keyingi turlarda birin-ketin ochkolarni qo'lga kirita boshlashdi.

Masalan, "Olmaliq"ni olaylik. Bu jamoa "Nasaf"ni mag'lub etganidan so'ng qatorasiga 11ta o'yinda yutqazmadi: olti g'alaba, besh durang. "Olmaliq"ning mag'lubiyatsiz seriyasi aynan "Nasaf"ga qarshi bahsdan keyin boshlandi.

"Nasaf" navbatdagi bahsni yana safarda, bu gal "Lokomotiv"ga qarshi o'tkazdi. Poytaxtliklar bungacha G'uzordan mag'lubiyat bilan qaytishgandi. Ammo uyda "Nasaf" mag'lub etilgach, "Lokomotiv" ketma-ket sakkizta uchrashuvda yutqazmadi. Jamoa ikki bor durang o'ynab, qolgan bellashuvlarda uch ochkoli bo'ldi.

"Nasaf" 12-turni Bekobodda "Metallurg"ga qarshi o'tkazib, yana nol ochko bilan qaytdi. Bu o'yindan keyin endi "Metallurg"ning omadi kelib, bekobodliklar "Nasaf" bilan o'yinni hisobga olganda ketma-ket to'rtta o'yinda g'alabaga erishishdi.

O'z maydonida "Nasaf"ni enggan yana bir jamoa "Paxtakor" bo'ldi. "Paxtakor" "Nasaf" ustidan g'alaba qozongach, birinchi davrada hali amalga oshirmagan ishini qildi, yani ilk marta safarda uch ochkoni qo'lga kiritdi. Jamoa "Obod"ni 4:1 hisobida mag'lub etdi, buning ustiga omadi kelmayotgan Igor Sergeev shu o'yinda ikkita gol urdi.

Aytib o'tganimizdek, "Nasaf"ning hali "Bunyodkor" bilan qoldirilgan o'yini bor. "Nasaf" yana safarda to'p tepishini inobatga olsak, qani ko'ramiz, o'yinda qanday hisob qayd etiladi-yu, keyingi voqealar qanday tus oladi?

X.Xoliqov.