"Qo'qon-1912": Futbolchilar tatilga chiqishdi

Qarshida bo'lib o'tgan O'zbekiston kubogi chorak finali dastlabki o'yinidan so'ng , bosh murabbiy No'mon Hasanov jamoa azolariga 9-iyulga qadar dam olish uchun ruxsat berdi.

Endi jamoa futbolchilari ikkinchi davraga tayyorgarlikni 9-iyul kuni boshlaydilar. Rejaga ko'ra 9 iyuldan 21 iyulga qadar jamoa Toshkent viloyatida navbatdagi o'quv-yig'in mashg'ulotlarini olib boradi. Bu yig'in davomida jamoa tarkibida o'zgarishlar bo'lishi mumkin. Murabbiylar shtabi jamoani kuchaytirish maqsadida ayrim futbolchilar bilan muzokaralar olib borishmoqda. Ular aynan qaysi o'yinchilar ekanligi haqida , ularning jamoa yig'iniga kelishi aniq bo'lgach xabar beramiz. SHuningdek navbatdagi yig'in davomida oliy liga klublari bilan o'rtoqlik o'yinlari ham o'tkaziladi.

Jamoaning serbiyalik futbolchilari Darko Gojkovich hamda Filip Rayevac davralar oralig'idagi tanaffusdan foydalanib o'z yurtlariga jo'nab ketishdi. Bu futbolchilar jamoaning navbatdagi o'quv-yig'inlariga biroz kechroq kelib qo'shiladilar.

Jamoaning uch nafar futbolchilari Oybek Rustamov , Javohir Sidiqov hamda Andrey Sidorovlar esa , O'zbekiston U-22 terma jamoasi bilan birga Qatar davlatida bo'lib o'tayotgan halqaro turnirda ishtirok etishmoqda.

Jamoa azolari navbatdagi rasmiy uchrashuvni 26 iyul kuni Qo'qonda o'tkazishadi. SHu kuni O'zbekiston kubogi chorak finali javob uchrashuvini o'tkazish uchun Qarshining “Nasaf” jamoasi Qo'qonga tashrif buyuradi.