Xitoyda transfer oynasi yopildi. Xitoyliklar yozda qancha sarflashdi?

Butun dunyo yulduzlarini o'z safiga qo'shib olishga uringan Xitoy chempionati "ajdarlari" so'nggi transfer oynasida juda kam "olov" sarfladi. Yozgi transfer mavsumida xitoyliklar bor-yo'g'i 28 mln. evro sarflashdi.

Xitoy Superligasi rahbariyatining legionerlar sonini 4 tadan 3 taga kamaytirish va xarid qilingan har bir futbolchi uchun sarflangan pul miqdorida 100% lik soliq to'lash kerakligi haqida qarorlardan so'ng, xorijlik futbolchilar importi sezilarli darajada kamaydi.

Xitoy chempionati O'zbekiston oliy ligasi kabi mart oyida boshlanib, noyabr oyida yakunlanadi. SHu sababli, fevral oyida Xitoy klublari transferlar uchun 403 mln. evro sarflashdi.

Biroq o'sha yirik xarajatlar o'z yakuniga etgan ko'rinadi. So'nggi marotaba bunday kam sarflar 2014 yilning yozida qayd etilgan. O'shanda xitoyliklar 27,5 mln. evro sarflashgan.

2017 yilning yozida 28 mln. evroning katta miqdori Adrian Ramos (12 mln. evro), Antoni Modest (5,7 mln. evro), Benjamin Mukanjolarga (5,5 mln. evro) sarflandi.

Xitoy klublari xarid qilgan futbolchilarning faqat bir necha nafari o'z puliga yarasha o'yin ko'rsatmoqda. Ulardan biri Xalk (15 ta gol) bo'lsa, ikkinchisi Eran Zaxavi (14 ta gol).