Kelajak loyihasi - Vodiy chempionlar ligasi start olish arafasida!

Loyiha O'zbekiston Respublikasi Jismoniy tarbiya va sport davlat qo'mitasi, O'zbekiston milliy olimpiya qo'mitasi, O'zbekiston futbol federaciyasi, "Championat.asia", "Best Sport Media", Namangan, Farg'ona va Andijon viloyatlarining futbol federaciyalari bilan hamkorlikda tashkil qilinadi.

Vodiy CHempionlar ligasi qanday bo'ladi?

2017/18 yilgi VCHL test ko'rinishida bo'lib o'tadi. Unda 10ta jamoa 18ta turdan iborat ikki davrali musobaqada qatnashadilar. Davralar oralig'ida "Vodiy Kubogi" bo'lib o'tadi. VCHL yakunida esa, VCHL g'olibi va Kubok sohibi o'rtasida Superkubok bo'ladi.

2018 yildan etiboran VCHL 16ta jamoani o'z ichiga qamraydi va unda 2005 yil tarbiyalanuvchilaridan tashqari, 2006 yilda tavallud topgan futbolchilar ham o'z yurishlarini boshlaydilar.

SHu tariqa 2021 yilga kelib VCHL 5ta yosh toifasida vodiy ligasiga ega bo'ladi.

VCHLda yo'llanmasini qo'lga kiritish uchun, har bir klub o'z viloyatida keyinchalik yo'lga qo'yiladigan viloyat chempionatida kuchli to'rtlikka kirishi kerak bo'ladi. Biz VCHLni tuzish bahonasida, hududlarda huddi poytaxtdagidek viloyat birinchiligini yo'lga qo'yamiz.

2022 yilga kelib vodiy stadionlarida, yangidan-yangi Odil Ahmedovlar javlon urishi kerak

2022 yilga kelib esa VCHL orqali, Vodiy ikkinchi ligasiga asos solinadi. 

2005 yilda tavallud topgan yosh charm to'p ustalari o'rtasida bo'lib o'tadigan musobaqada Andijon, SHahrixon, Farg'ona, Qo'qon, Kosonsoy, Namangan va To'raqo'rg'ondan jamoalar ishtirok etadilar. Ular qatorida, "Neftchi", "Navbahor" va "Andijon" jamoalariga biriktirilgan futbol maktablari ham qatnashadilar.

Musobaqa reglamentiga ko'ra 9ta jamoaning har biri 2017 yil bir marotaba tur o'yinlariga mezbonlik qiladilar. Barcha jamoa bir shaharda yig'iladi. Bu bilan ular nafaqat o'z tarbiyalanuvchilarini sinovdan o'tkazadilar, balki tur o'yinlarini sifatli o'tkazishni ham o'rganib boradilar.

VCHLga Odil Ahmedov homiylik qiladi. Musobaqada Rauf Inileev selekcioner murabbiy sifatida faoliyat olib boradi va eng sara 2005 yilda tavallud topgan futbolchilarni 2018 yil kollejga kirish uchun tavsiya beradi. Bu bilan biz kollej tizimini ham sifatli futbolchilar bilan boyitib borgan bo'lamiz. Undan tashqari, yosh istedod egasi Evropa talablariga javob bersa, uni hozirning o'zidanoq Evropa klublariga joylash ishlari olib boriladi. Bu borada Ispaniya va Italiyadagi hamkorlarning xizmatidan foydalaniladi.

5 yillik dasturni o'z ichiga qamrab olgan VCHL orqali, ko'plab istedod egalarini vodiyni o'zida saqlab qolish va ularga mahalliy klublar orqali MTJga yo'l olishlarini taminlash bo'ladi. 

Mazkur loyiha o'z mevasini 2025 yilga kelib albatta bera boshlaydi. 2017/18 yilgi mavsum ishtirokchilari, shu yilga kelib 21 yoshga to'lgan bo'ladilar. 

"Vodiyga juda ko'p tashrif buyuraman, bu erdagi istedodlar uchun musobaqalar juda kam. Imkon qadar o'tkazilayapti, lekin uzoq vaqtni qamrab oladigan chempionat yo'q. Bu o'yin amaliyotini etishmasligi va ota-onalarni farzandlarini Toshkentga olib ketishiga sabab bo'layapti. Bu erga kelgan hamma ham muvaffaqiyatga erishmaydi. Bu avvalo katta xarajat, ikkinchidan bolaning tarbiyasi. Agar farzand uchun o'sha viloyatning o'zida yaxshi turnir bo'lib, mahalliy kollej va liceylar sifatli darajada ishlashni boshlasa, hech qanday Toshkentning keragi bo'lmaydi. Mana shunda "Neftchi", "Navbahor", "Andijon" va "Qo'qon-1912" kabi jamoalar mahalliy futbolchilar bilan muvaffaqiyatga erishadilar. 

Vodiy futbolini ko'tarish uchun menga Odil Ahmedov murojaat qildi. U bilan doimo bolalar futboli borasida bir xil fikr yuritganmiz. Faoliyatini tugatguniga qadar yordam berib turamiz. Bir kun u albatta vodiyga qaytadi va bu erda o'z ishini davom ettiradi. Hozir uning loyihasiga qarshi chiqayotganlar ham bo'layapti. Lekin ota-onalar, bolalar futbol klublari biz tomonimizda", - deydi loyiha muallifi Nodirxo'ja Yuldashev.