Namangan shahri hokimi "Navbahor"ning kelajagini yoshlar bilan qurmoqchi

13 iyul kuni "Navbahor" klubining rahbarlari va futbolchilari o'rtasida hokimiyatda yig'ilish bo'ldi. Unda SHavkatjon Abdurazzoqov klubning yangi prezidenti sifatida tanishtirildi. Murabbiy va futbolchilar bilan suhbatdan so'ng klub prezidenti kuni kecha yangi rejasini tadbiq etdi.

Unga ko'ra, bir necha yillardan beri asosiy tarkibning soyasida beetibor qolib kelayotgan "Navbahor" klubining o'rinbosarlariga yangi baza taqdim etildi. Endi namanganlik yoshlar Toshbuloqdagi stadiondan baza sifatida foydalanadilar. SHu kungacha "Navbahor" o'rinbosarlari duch kelgan maydonda shug'ullanib yurgandilar. Endi asosiy tarkibdan tashqari jamoaning o'rinbosarlari ham nazoratda bo'lishadi.

Undan tashqari jamoa o'rinbosarlarining byudjeti alohida bo'ladi. Asosiy tarkibning natijalaridan qatiy nazar o'rinbosarlar qiynalmay o'z ishida davom etadi. O'rinbosarlar jamoasining o'z murabbiylar shtabi va boshqaruvchi-menejeri bo'ladi. Bu loyihani amalga oshirishdan maqsad, yaqin yillar ichida "Navbahor"ning asosiy tarkibiga yaxshi futbolchilarni tarbiyalab berish va yo'qolib borayotgan ishonchni qaytarish. Bugungi kunda "Navbahor" o'rinbosarlari 16 jamoa ichida, 16-o'rinni band etib turibdi.

Mazkur loyihani, Namanganda faoliyat boshlayotgan Odil Ahmedov akademiyasi bilan chambarchas bog'lasa, ish sifati yanada sifatli bo'lishini aytish mumkin.

Klub prezidentining boshlagan xayrli ishiga omad tilaymiz!