Boshqa klublar "Obod" oliy ligada qolishini xohlamoqda. Nima uchun?

Katta ehtimol bilan hammasi yaxshi bo'ladi va "Obod" ikkinchi davradagi ishtirokini davom ettiradi. Aytaylik, "Obod"ga homiy topildi, klubda pul bor va futbolchilar o'yinlarga tayyorgarlik ko'rishni boshlashdi. Buning qanday foydali tomonlarini ko'ramiz?

Birinchi navbatda oliy liga taqvimi o'zgarmaydi. Agar "Obod" qatnashmaydigan bo'lsa, har turda sakkiztamas, ettita o'yin bo'ladi va navbati bilan "Obod"ga qarshi o'ynashi kerak bo'lgan bittadan jamoa dam oladi. Lekin "Obod" o'z ishtirokini davom ettirgan taqdirda hammasi yana avvalgi holicha qoladi.  

Mavsumning ikkinchi yarmiga tayyorgralik ketayotgan bir paytda boshqa klublar "Obod"ning elitada qolishiga to'liq xohish bildirmoqda. Xullas hamma "Obod"ning qolishidan manfaatdor. Nima uchun? Birinchi sabab shundaki, "Obod" oliy ligada qolgani bilan ikkinchi davraga yaxshi tayyorgarlik ko'rmadi, kerakli transferlarni amalga oshirmadi, qolaversa, eng yaxshi hujumchisi Norxonov klubni tark etdi. 

SHunday kelib chiqib aytganda, "Obod" baribir autsayder klub bo'lib qolaveradi, hatto chet eldan murabbiy olib kelgan taqdirda ham. Hozirda 15ta klub "Obod"ning qolishini astoydil kutmoqda, chunki "Obod" boshqalarga tayyor "go'sht" bo'ladi va hamma bu jamoani yutib mukofot puli ishlab yuraveradi. 

Boshqalarning "Obod"ga qayg'urayotgani asl sababi mana shunda, agar g'alaba uchun mukofot puli berilmaganida bu klub bilan hech kimning ishi bo'lmasdi. "Obod" birinchi davrada faqat ikkita g'alabaga erishdi. Uch marta durang o'ynab, o'nta o'yinda mag'lub bo'ldi. Demak, birinchi davrada o'nta klub "Obod"ni yutib mukofot puli ishladi. Ikkinchi davrada bunday jamoalar soni yanada ko'payishi mumkin. 

Lekin ikkinchi tomondan "Obod" oliy ligada qolgani bilan futbol rivojiga nima beradi? Agar bu jamoa boshqalarga astoydil raqobat qilib g'alabalarga erishsa va turnir jadvalining quyi qismida intrigani yuzaga keltira olsa, bundan klub ham, chempionat ham yutadi. Mabodo qolgani bilan birinchi davradagidek yutqazib yuraversa, unda klubning ishtirok etganidan etmagani yaxshi. Mayli, bir paytlari Janubiy Koreyada bo'lgani kabi 15ta jamoa o'ynasin, bitta kam o'yin bo'lsin, ammo haqiqiy o'yinlarni ko'raylik. 

X.Xoliqov.