“Nasaf” – “Paxtakor”: g'alaba kim uchun muhim?

“Nasaf” jamoasi O'zbekiston Kubogini qo'lga kiritganidan so'ng muxlislarning jamoaga bo'lgan ishonchi haddan ziyod oshib ketdi. Ular endi bu yilgi mavsumda jamoaning chempionlikni ham qo'lga kiritishini chamalab qolishdi. Afsuski, ushbu tarixiy yutuq qo'lga kiritildiyu, go'yoki “Nasaf”ning ishtiyoqi ham so'ndi. O'zbekiston Kubogi finalidan keyingi o'yinlarda muxlislar hohishi puchga aylandi. Garchi Jizzaxda “So'g'diyona” so'nggi daqiqalarda mag'lub etilgan bo'lsada, so'nggi ikkita o'yinda ketma-ket ochko yo'qotildi.

Endi navbatdagi “Paxtakor”ga qarshi o'yindan oldin  g'aroyib mish-mishlar quloqqa chalina boshlandi: nima emish -“Nasaf” “Paxtakor”ga yutqazar emish. Bunga sabab, muxlislarning o'z sevikliklariga nisbatan biroz ishonchlari pasayganidan ham darak beradi.

Agar shunday bo'lsa, nima bo'ladi? Albatta hech qanday fojea yuz bermydi. Ammo… ammo bu holatda bir narsa sodir bo'lishi aniq. Nima sodir bo'lishi mumkin deysizmi? “Nasaf”ning mavsum buyicha yiqqan obro'yi deymizmi yoki o'z muxlislarining o'ziga bo'lgan ishonchiga putur ketishi aniq.

SHunday ekan, bugungi o'yinda “Nasaf” jamoasi bor kuchi bilan hujumkor o'yin ko'rsatib, voha futbol ishqibozlari ko'z o'ngida “Nasaf” qanaqa jamoa ekanligini ko'rsatib qo'yishi talab etiladi. Bunga “Nasaf”ning saohiyati ham kuchi ham etarli. Faqat hohish va harakat bo'lsa bo'ldi. Qolaversa, sevimli jamoamiz qatorasiga 9 yildan buyon chempionat doirasida “Paxtakor”ni mag'lub eta olmay kelmoqda. Ro'ziqul Berdievga bo'lgan ishonchimiz cheksiz. U shu paytgacha jamoada ishlagan Viktor Borisov, Bahrom Hakimov, Anatoliy Demyanenko, Viktor Kumikov eplay olmagan ishni amalladi- O'zbekiston kubogi finalida g'alaba qozondi. Berdiev endi o'zidan oldin ishlagan murabbiylar Toshev, Kumikov va Demyanenko uddalay olmagan ishni amalga oshirishi shart. Topdingiz, bu murabbiylar qo'l ostida “Nasaf” “Paxtakor”ni mag'lub etolmay kelmoqda. Garchi “Nasaf”ning chempionatdagi o'rni allaqachon malum bo'lib ulgurgan bo'lsada, principial raqibni Qarshida taslim etilishini muxlislar salkam 10 yildan buyon kutishmoqda.

Bugungi o'yinda g'alaba qozonishni futbolchilarning o'zlari ham ich-ichlaridan xohlayotganlariga shubha yo'q. SHu sabab barcha futbol ishqibozlarini  “Nasaf” – “Paxtakor” uchrashuviga taklif etib qolamiz. O'yin soat 14:00 da boshlanishi belgilangan.

SHunday ekan mish-mishlar asoslimi, yo'qmi  buni bugungi uchrashuvdan keyin bilib olamiz.

Renat Ernazarov