Rasmiy xabar: "Obod" oliy ligada qoldi va ikkinchi davrada o'ynaydi

Klub rahbariyatida ishlab kelayotgan kishilardan birining saytimizga malum qilishicha, "Obod" yangi homiyga ega bo'ldi. 

"Jamoaga Ukrainadan homiylar keldi, bundan buyon ular jamoani pul bilan taminlashadi va "Obod" ikkinchi davradagi ishtirokini davom ettiradi, - deydi klub vakili. - Lekin men hozircha yangi homiylar to'g'risida va ular nima ish bilshan shug'ullanishi haqida hech narsa deya olmayman. Faqat shuni aytishim mumkin, ikkinchi davrada jamoani yangi murabbiy boshqaradi va u ham ukrainalik. Yangi murabbiy hozir futbolchilarni ikkinchi davra o'yinlariga tayyorlamoqda". 

"Obod"ni ikkinchi davrada boshqaradigan yangi murabbiy bu - Andrey Anatolevich Demchenko. Rossiya va Ukraina fuqaroligiga ega sobiq futbolchi 1976 yil 20 avgustda tug'ilgan. Futbolchilik faoliyati davomida CSKA, "Ayaks", "Metallurg" (Zaporoje), "Ilichyovec", "Obolon", "Dachiya", "Gelios" kabi klublarda to'p tepgan. 

2011 yil murabbiylik sohasida ish boshlagan Demchenko dastlab Zaporojening "Imeks" klubini boshqargan. 2012 yilda o'zi o'ynagan "Metallurg"ga murabbiylik qilgan. 2013-2015 yillarda esa "Metallurg"ning o'rinbosarlar jamoasini boshqargan. Ammo oxirgi ikki yilda uning qaerda ishlagani borasida malumotga ega emasmiz. 

Oliy liga ikkinchi davra taqvimiga ko'ra "Obod" 16-tur uchrashuvini 5 avgust kuni o'z maydonida "Navbahor"ga qarshi o'tkazadi. 

X.Xoliqov.