Vohid SHodiev: "Qishda yo'qotilgan ikki oy qimmatga tushdi"

Unga ko'ra, "Qizilqum"dan o'tgan hujumchi Vohid SHodiev 14-raqamda o'ynaydigan bo'ldi. Tadbirdan keyin hujumchining "qaldirg'ochlar" safiga o'tishi borasidagi fikrlarini bilish maqsadida kichik suhbat uyushtirdik.

- Birinchi davrani "Qizilqum"da omadsiz o'tkazganingizni hisobga olganda, "Bunyodkor"da raqobatga bardosh bera olasizmi?
- Muhimi raqobatning borligi. Raqobatdan qo'rqmayman, ishlayman va harakat qilaman. Birinchi davrada jarohatlar va ayrim sabablarga ko'ra o'zimni ko'rsata olmadim. "Bunyodkor"da imkoniyat berishsa, undan foydalanishga harakat qilaman. "Qaldirg'ochlar" safiga aynan raqobat borligi uchun ham o'tdim. CHunki, aynan shu omil futbolchini o'z ustida ko'proq ishlashga majbur qiladi.

- "Qizilqum"da faqat jarohat halal berdimi yoki o'yin uslubiga mos tushmadingizmi?
- Balki, ularning o'yin uslubiga ham mos tushmagandirman. Kamiga jarohat. Bir qancha sabablar yig'ilib omadsiz davra bo'ldi. Men uchun eng katta minus bo'lgani, futbolchining jismoniy holati uchun juda zarur bo'lgan qishki yig'inni o'tkazib yubordim. Ikki oy davomida futboldan chetda bo'ldim. SHu sabab, o'sha yo'qotilgan ikki oy o'rnini to'ldirish qiyin bo'ldi.

- Murabbiy "Bunyodkor"ga taklif etish jarayonida sizdan nimani kutishini aytdimi?
- Bu klubda oldin ham o'ynaganman. Jamoa o'z oldiga doimo katta maqsadlarni qo'yadi. Klub ichidagi principlarni va talablarni yaxshi bilaman. SHu o'rinda, menga oldingi holatimga qaytish uchun imkoniyat berayotgan Mirjalol Qosimovga rahmat aytaman.

Tolibjon Qosimov suhbatlashdi