Mirjalol Qosimov: “O'n bir himoyachiga qarshi o'ynash oson emas”

- Yarim finalga kuchsiz jamoa etib kelmaydi. “Dinamo”ning himoyadan o'ynashini bilgan edik va shunga yarasha tayyorgarlik ko'rgandik. Kutganimdek, bugun samarqandlik futbolchilar 5-4-1 sxemasi asosida o'z o'yinlarini tashkil etishdi. Bizga bugun tezkor gol etishmadi. Otabek SHukurov, Akrom Komilovda darvozani ishg'ol qilish uchun yaxshigina vaziyatlar yuzaga kelgandi. Afsuski, ular bu imkoniyatdan foydalana olishmadi. Zaxiradan maydonga tushgan o'yinchilarimiz esa men nimani talab qilayotganimni tushunib etishmadi. Bunday mustahkam himoyani faqat markazdan uyushtiriladigan hujumlar bilan yorib o'tib bo'lmaydi. SHuni yigitlarga tushuntirib, qanotlardan hujum tashkil qilishni uqtirgandim.

- Bugun “Neftchi” bilan bo'lib o'tgan o'yindagi shiddatni ko'rmadik. Buning sababi nimada?

- “Neftchi” bilan nisbatan ochiq futbol ko'rgandik. Bugun “Dinamo”ning 11 nafar himoyachisiga qarshi o'ynash oson kechmadi. Bizning futbolchilarga aql etishmadi. Boshqa tomondan hali hech narsa yo'qotilgani yo'q. “Dinamo” ham o'z maydonida mag'lubiyatga uchrab, Muborakda kechgan javob uchrashuvida g'alaba qozonib ketdi. Nima uchun biz Samarqandda zafar quchmasligimiz kerak?

- “Dinamo” ko'rsatgan o'yin haqida fikringiz qanday?

- Futbolchilar bugun o'z murabbiylari ko'rsatmalarini to'liq bajarishdi. Himoyada bexato harakat qilishdi.

- Mirjamol Qosimovning bugungi o'yini haqida nima deysiz?

- Xatolari bor, buni o'zi ham biladi. Unda baribir Mirjalol Qosimovning o'g'li degan tushuncha miyasida turadi. SHu narsa unga o'yinda halal berib kelyapti. O'ziga ham bu haqida ko'p gapiraman. Mashg'ulotlarda ham tinmay ishlayapti. Hamma tatilga chiqqanida u mashg'ulotlarni davom ettirdi. Asta-sekin hammasi o'z iziga tushib ketadi.