Rossiyada stadionlarni JCH-2018ga tayyorlash davom etmoqda (FOTO)

2017-08-09 14:10:01 / Kiritdi: BestMaster O'qilgan: 1177

Kelasi yil Rossiyaning 12ta stadionida jahon chempionati bahslari bo'lib o'tadi.

Hozirda ettita stadionda ish qizg'in davom etmoqda. "Rostov Arena" va "Nijniy Novgorod" stadionlariga yaqinda chim yotqizildi. Jahon chempionati bahslarini o'tkazish uchun beshta stadion deyarli tayyor. Endi qolgan ettita o'yingohni har tomonlama mukammal holatga keltirish talab etiladi.

Havo birmuncha iliq bo'lgani uchun "Ekaterinburg Arena"dagi maysa ancha bo'y cho'zib qoldi. Mutaxassislar shuningdek, "Kaliningrad" stadioniga ham maysa yotqizmoqchi, lekin bu ish keyingi haftaga qoldirildi. Hozirda stadionni vazni 15 ming tonna bo'lgan metall bilan yopish ishlari olib borilmoqda.

Ishchilar "Volgograd Arena"ning devorini yopib bo'lishdi, uning eng baland nuqtasi 49,5 metrni tashkil etdi. Endi 77 ming kv. metrdan iborat tomni yopish qoldi xolos. "Mordaviya Arena"da esa 1496 kishi stadionni jahon chempionatiga shay holda keltirish uchun mehnat qilmoqda.

Xullas hamma joyda stadionlarni mundialga tayyorlash davom etyapti. Mutaxassislarning aytishicha, jahon chempionatiga qadar barcha stadionlar risoladagidek bo'ladi.