Angliyada boshlangan mavsum haqida bilishimiz kerak bo'lgan olti yangilik

Yangi mavsumda Angliyada yangiliklar kiritilgan va biz ularni sizga eslatib o'tishga qaror qildik.

YANGI TIZIMDAGI PENALTILAR SERIYASI

"Arsenal" hamda "CHelsi" o'rtasidagi Angliya Superkubogi uchun bo'lib o'tgan bahs esingizdami. Aynan shu uchrashuvda penaltilar seriyasining yangi tizimi qo'llanildi. Yani, A-B-B-A tizimi (A - birinchi jamoa, B - ikkinchi jamoa). Seriyani boshlagan jamoadan so'ng nuqtaga yaqinlashgan klub ikkita zarba yo'llaydi, navbatdagi jamoa ham shunday bo'ladi. Endi Angliya chempionat va kuboklarida xuddi shu tizim qo'llaniladi.

"SHO'NG'UVCHILAR"GA JAZO

Yangi mavsumda jarima zarbasi ishlashni istagan "aktyorlar" jiddiy jazolanadi.

Vaziyatlar sobiq futbolchi, sobiq murabbiy va sobiq hakamdan iborat bo'lgan guruh tomonidan o'rganib chiqiladi. Simulyaciya qilgan futbolchi 2 uchrashuvga chetlatiladi.

CHIMGA TEGILMASIN

"Lester Siti" APLda chempion bo'lgan mavsum maydonidagi ajoyib suratlar bilan hammani hayron qoldirgani sir emas. Zig-zag chiziqlar, klub gerbi va yana boshqa suratlar. Premer-liga rahbariyati ushbu ishlarni taqiqladi va endi barcha maydon chimlari odatiy gorizontal chiziqlarga ega bo'ladi. Ushbu qoida UEFA talablariga ham javob beradi.

KARABAO Kubogi

Milk, Littlewoods, Rumbelows, Coca-Cola, Worthington, Carling va Capital One dan so'ng yangi kubok paydo bo'ldi: Karabao Kubogi! Kara-nima? Bu Tailandning energetik ichimlik ishlab chiqaruvchi kompaniyasi. Ular Angliya Liga Kubogi homiyiga aylanishdi va bu mavsum turnir Karabao Kubogi deb ataladi.

YANGI TO'PLAR

Yangi mavsumda har doimgidek yangi to'plardan foydalaniladi. Bu to'pga The Ordem V deb nom berishdi. Angliya Premer-ligasida Nike kompaniyasining o'n ettinchi to'pi foydalaniladi. 2001 yilda APL Nike bilan hamkorlikni boshlagan edi. Ushbu to'pning bosimi barcha joyida bir xil va aniq zarbadan so'ng to'p kerakli joyga borib tushadi.

Sentyabr boshlanishi bilan darvozabonlar to'p havodan yo'nalishini o'zgartirayotganini, hujumchilar esa to'p avvalgisidan yaxshi ekanligini aytishadi. Xuddi avvalgi mavsumdagidek.

FUTBOLKADAGI RAQAMLAR

Oddiy, lekin muhim yangilik. Premer-liganing yangi logotipi barcha raqamlarga tushiriladi. Raqamlar shrifti esa barcha jamoada bir xil bo'ladi.