Ilhom Mo'minjonov: “Maqsadimiz har bir o'yinda ijobiy natija qayd etish”

- Bugungi o'yin bizni juda hursand qildi. CHunki birinchi davraning dastlabki qismini ishonchli o'tkazib, yuqori o'rinlar uchun kurashgandik. Lekin, xatolarimiz oqibatida pastki pog'onalarga tushib qolgandik. Davra so'nggidagi xato va kamchiliklarni takrorlamaslik maqsadida mashg'ulotlarda tinimsiz ravishda ishlamoqdamiz.

Ijobiy natijalar orqali muxlislarimizni xursand qilish niyatidamiz. Ikkinchi davraning “Obod”ga qarshi o'yinimiz ham qiyin bo'lgandi. “Qo'qon-1912” jamoasi ham bugun “Obod”ni qiyinchilik bilan mag'lub etdi. Bugungi natijalarga etibor qaratsak kichik hisoblar kuzatilganiga guvoh bo'lamiz. Birgina “Paxtakor” yirik hisobda “Neftchi”dan ustun keldi. Bu chempionatimizni murosasiz ruhda o'tayotganligidan darak bermoqda. Yani ochkolarni to'plash oson bo'lmayapti va raqobat ham ancha kuchli. Maqsadimiz har bir o'yinda ijobiy natija uchun intilib, yuqori o'rinlarga ko'tarilishdan iborat. Bugungi o'yin uchun futbolchilarimizga rahmat aytaman. Ular o'z imkoniyatlari darajasida to'p surishdi. Ushbu g'alabamizni o'yingohda jamoamizni qo'llab-quvvatlagan muxlislarimizga bag'ishlaymiz.

Ishqibozlarimizni har doim jamoani shu tarzda qo'llab-quvvatlashlarini istayman. Mazmunli o'yinlarimiz orqali muxlislarni o'yingohga qaytarishga harakat qilamiz. G'alaba qozonganimizda, durang yoki mag'lubiyat qayd etilganda ham birga bo'lib bizga dalda bo'lishsa yanada chiroyli o'yinlar namoyish etib, yuqori cho'qqilar sari intilishda davom etamiz. Ishqibozlarimizga qo'llayotganliklari uchun minnatdorchilik bildiraman.