Abdujabbor Marufaliev: "Bolgariyadagi ijobiy natija bilan qaytmoqchimiz"

Ushbu jamoani anchadan beri murabbiy Abdujabbor Marufaliev  tayyorlab kelmoqda. Bolgariyaga ham Marufaliev boshchiligida yosh "qaldirg'ochlar" yo'l olgan. Abdujabbor Marufaliev bilan bog'lanib turnir haqida suhbatlashdik.

- Yaqinda Andijon shahrida bo'lib o'tgan "Xotira-79" musobaqasida ishtirok etib qaytdinglar. Ushbu turnir Bolgariyada o'tayotgan musobaqa uchun tayyorgarlik vazifasini o'tab berdimi?

- Albatta, biz Andijondagi musobaqada munosib ishtirok etdik. O'tkazilgan barcha uchrashuvlarning birida durang natija qayd etgan bo'lsak qolgan uchrashuvlarda g'alaba qozondik. Biz Andijonga asosiy tarkib futbolchilarini olib bormagandik. Asosan ikkinchi tarkibdagi futbolchilarni qay darajada ekanliklarini ko'rib olish uchun ularni olib borgandik. Andijondagi turnirda deyarli barcha futbolchilarni ko'rib oldim. Ular orasidan bir nechtasini saralab oldik va Bolgariyadagi turnirga olib ketdik. Bundan tashqari malum bir sabablarga ko'ra "Xotira-79" musobaqasida ishtirok eta olmagan bir qator futbolchilarni o'zimiz bilan birga Bolgariyaga olib ketdik.

- Andijon viloyatida "Xotira-79" musobaqasida ishtirok etdik deb aytib o'tdingiz. O'zingizni jamoangizdan tashqari boshqa raqib klublarning yosh futbolchilarini ham kuzatdingizmi?

- Boshqa jamoadagi bolalarni ham kuzatib bordik. Bizni asosan "BFK-Asia" jamoasida futbol sir-asrorlarini o'rganayotgan bolakaylar qiziqtirib qo'ydi. U erda juda ham ko'p istedodli bolalar bor ekan. 4-5 nafar iqtidorli bolalarni ko'z ostimga olib qo'ydim. Bolgariyadan qaytganimdan so'ng albatta ularni "Bunyodkor" akademiyasiga chaqiraman.

- Bolyagariyaga ketishdan oldin tayyorgarlik qay darajada o'tkazildi?

- Tayyorgarlik alo darajada o'tkazildi. Har bitta bolani alohida imtihondan o'tkazdik. Mashg'ulotlar yaxshi o'tkazildi. Turnirga 100 foiz tayyorgarlik ko'rib bordik. 

- U erda qanday jamoalar ishtirok etayapti?

- Bolgariya va Moldaviya bolalar futbol jamoalari ishtirok etishmoqda. Biz bu erga g'olib bo'lish maqsadida tashrif buyurganmiz.