Muhammad Kone: Burkina Faso terma jamoasi murabbiylari “Lokomotiv”dagi o'yinlarimni kuzatib borishmoqda

Afrikada o'tkazilayotgan saralash bahslari doirasida burkinaliklar Senegal terma jamoasi bilan 2 ta uchrashuv o'tkazishadi. Mazkur uchrashuvlarga jo'nab ketish oldidan mahoratli himoyachi o'z fikrlarini bildirib o'tdi.

– O'z yurti milliy terma jamoasi safida o'ynash – har bir futbolchi uchun faxr. Men ham Burkina Faso sharafini himoya qilish imkoniyatiga ega bo'lganimdan juda mamnunman. Rosti – ushbu taklif men uchun kutilmaganda bo'ldi. Terma jamoa murabbiylar shtabi mening “Lokomotiv” safidagi o'yinlarimni kuzatishibdi va yakunda bosh jamoaga chaqirishga qaror qilishibdi. Bundan juda-juda xursandman.

Men birinchi marta milliy terma jamoaga chaqirildim. Terma jamoamizda mahoratli va Evropada nom qozongan ijrochilar ko'p. Ulardan ko'p narsalar o'rganishga harakat qilaman.

Hozirda Burkina Faso terma jamoasi o'z guruhida birinchi o'rinda ketmoqda. Lekin bo'shashishga aslo haqqimiz yo'q. Zero guruhimizdagi raqiblar – JAR terma jamoasi, Senegal hamda Kabo Verde ham yaxshi saviyadagi jamoalar. O'ylaymanki, Jahon chempionati yo'llanmasi uchun kurash so'nggi turga qadar kechadi. Men ham mazkur o'yinlarda maydonga tushib, terma jamoamga foyda keltirishga urinaman, – deydi Muhammad Gnontcha Kone “Lokomotiv” matbuot xizmatiga.

Takidlash joizki, Afrikada o'tayorgan JCH-2018 saralashining so'nggi bosqichida Burkina Faso terma jamoasi “D” guruhida ishtirok etmoqda va 2-turdan so'ng 4 ochko bilan peshqadam bo'lib turibdi. Ushbu yurt vakillari 2 sentyabrda safarda va 5 sentyabr kuni uyda Senegal terma jamoasi bilan bahs yuritishadi.